Վրաստանում Ամերիկայի Միացյալ Նահանգների դեսպան Քելի Դեգնանը հանդիպել է Արտաքին հարաբերությունների և Պաշտպանության հանձնաժողովների նախագահներ՝ Նիկոլոզ Սամխարաձեի և Իրակլի Բերաիայի հետ։

Ինչպես լրագրողներին հայտնել է դեսպանը, հանդիպման ընթացքում քննարկվել է վրացական պատվիրակության այցը Միացյալ նահանգներ։

Դեգնանը նաև ասել է, որ տարածաշրջանային լարվածության պայմաններում ԱՄՆ-ի և Վրաստանի համար կարևոր է սերտ հաղորդակցության պահպանումը։

«Ես շատ արդյունավետ հանդիպում ունեցա, մենք խոսեցինք վրացական պատվիրակության Վաշինգտոն կատարած այցի մասին։ Պատվիրակությունը հանդիպել է Կոնգրեսի, Պետքարտուղարության և քաղաքացիական հասարակության անդամների հետ՝ քննարկելու Վրաստանի և Միացյալ Նահանգների երկկողմ հարաբերությունները։ Մենք քննարկել ենք նաև բազմաթիվ այլ հարցեր։ Միացյալ Նահանգները և Վրաստանը, որպես կանոն, աշխատում են տարբեր կարևոր հարցերի շուրջ, և տարածաշրջանային լարվածության պայմաններում հատկապես կարևոր է սերտ շփումների պահպանումը»,- ասել է Դեգնանը։