Սննդամթերքի ազգային գործակալություն. Շների հիպերպոպուլյացիայի կառավարման ծրագիրն առավելագույնս թափանցիկ է, շների ոչ պլանային հավաքագրման վերաբերյալ մեղադրանքները չեն համապատասխանում իրականությանը

Շների հիպերպոպուլյացիայի կառավարման ծրագիրն առավելագույնս թափանցիկ է։ Տարբեր վայրերից շների ոչ պլանային հավաքագրման վերաբերյալ մեղադրանքները չեն համապատասխանում իրականությանը, – այս մասին նշված է Սննդամթերքի ազգային գործակալության տարածած տեղեկատվության մեջ։

Նրանց հայտարարության համաձայն՝ շների գերբնակեցման կառավարման ծրագիրն ընթանում է ըստ պլանի՝ երկու ուղղությամբ, և ներառում է անասնաբուժական միջամտությունների իրականացում ինչպես անօթևան, այնպես էլ տեր ունեցող շների համար։

«Ծրագրի շրջանակներում անօթևան/խնամակալություն ունեցող շների համար իրականացվում է ստերիլիզացում/ամորձատում (կաստրացիա), նույնականացում-գրանցում, կատաղության դեմ պատվաստում, ախտորոշիչ հետազոտություններ, իսկ տեր ունեցող շների դեպքում նախատեսվում է էգ շների ստերիլիզացում, նույնականացում (միկրոչիպերի կիրառմամբ) և գրանցում միասնական էլեկտրոնային բազայում։

Գերբնակեցման կառավարման ծրագրի մշակման գործընթացում, Սննդամթերքի ազգային գործակալության հատուկ հրավերով, ներգրավված է եղել Կենդանիների առողջության պահպանման համաշխարհային կազմակերպության (WOAH) կողմից երաշխավորված փորձագետ, ով ավելի քան 20 տարվա մասնագիտական փորձ ունի կենդանիների բարեկեցության և անօթևան կենդանիների պոպուլյացիայի կառավարման ոլորտում։ Նա հանդիսանում է ICAM-ի (International Companion Animal Management Coalition) կառավարման խորհրդի անդամ, FAO-ի և TAIEX-ի փորձագետ, և երկար տարիներ ղեկավարում է RSPCA-ի միջազգային ծրագրերը Եվրոպայի և Կովկասի տարածաշրջանում։ Ծրագիրն իրականացվում է նրա հանձնարարականներով, ինչն ապահովում է համապատասխանությունը միջազգային լավագույն փորձին։

Միևնույն ժամանակ, գործընթացի առավելագույն թափանցիկությունն ապահովելու նպատակով ստեղծվել է համապատասխան հարթակ՝ ֆեյսբուքյան էջ, որտեղ տեղեկատվությունը պարբերաբար թարմացվում է. այդ թվում՝ հրապարակվում են շների հավաքագրման և նրանց բնական միջավայր վերադարձնելու տեսանյութերը, ժամանակացույցը, ամսաթիվն ու վայրերը», – ասված է Սննդամթերքի ազգային գործակալության տեղեկատվության մեջ։

Գործակալության հաղորդմամբ՝ միջոցառումներն իրականացվում են կենդանասերների, խնամակալների և տեղական համայնքապետարանների հետ համակարգմամբ, իսկ անասնաբուժական միջամտությունների ավարտից հետո կենդանին վերադարձվում է իր նախկին բնակության վայր։

«Գերբնակեցման ծրագրով նախատեսված միջոցառումների իրականացման գործընթացը լիովին թափանցիկ է։ Խմբերը կենդանիների հավաքագրումն իրականացնում են նախապես սահմանված և հրապարակված ժամանակացույցով։ Հետևաբար, առանձին խմբերի կողմից տարածվող մեղադրանքներն այս կամ այն վայրից շների հավաքագրման մասին զուրկ են որևէ հիմքից», – հայտարարել է Շների գերբնակեցման կառավարման ծրագրի ղեկավարի տեղակալ Ցիրա Նափետվարիձեն։

Սննդամթերքի ազգային գործակալության հաղորդմամբ՝ կարևոր է նաև այն, որ ծրագիրը համալիր է, և անասնաբուժական միջոցառումներին զուգահեռ նախատեսվում է կենդանիների միջհամայնքային կացարանների կառուցում Սամեգրելո-Զեմո Սվանեթի, Քվեմո Քարթլի և Սամցխե-Ջավախեթի տարածաշրջաններում։