Մեկնարկել է Ադրբեջանի վարչապետ Ալի Ասադովի աշխատանքային այցը Վրաստան
Մեկնարկել է Ադրբեջանի վարչապետ Ալի Ասադովի աշխատանքային այցը Վրաստան։ Տեղեկատվությունը տարածել է Վրաստանի էկոնոմիկայի և կայուն զարգացման նախարարությունը։
Նախարարության տվյալներով՝ Ադրբեջանի վարչապետին Թբիլիսիի Շոթա Ռուսթավելիի անվան միջազգային օդանավակայանում դիմավորել է Վրաստանի փոխվարչապետ, էկոնոմիկայի և կայուն զարգացման նախարար Մարիամ Քվրիվիշվիլին։
Այցի շրջանակներում Վրաստանի և Ադրբեջանի վարչապետների համանախագահությամբ կկայանա երկու երկրների տնտեսական համագործակցության միջկառավարական հանձնաժողովի 11-րդ նիստը։
Մարիամ Քվրիվիշվիլիի խոսքով՝ միջկառավարական հանձնաժողովի շրջանակներում կքննարկվեն երկրների միջև առևտրի և տնտեսական համագործակցության կարևոր հարցեր։
«Հանձնաժողովը կքննարկի կարևոր հարցեր, ինչպիսիք են երկու երկրների միջև համագործակցությունը էներգետիկայի, տրանսպորտի, ներդրումների, առևտրի և այլ ոլորտներում։ Մենք նաև հնարավորություն կունենանք խոսելու տարածաշրջանային նշանակության նախագծերի մասին, որտեղ Վրաստանի և Ադրբեջանի միջև համագործակցությունը մեծ դեր է խաղում, հատկապես Միջին միջանցքի համատեքստում», – ասել է Մարիամ Քվրիվիշվիլին։