Սլովենիայում հորդառատ անձրեւների հետեւանքով առաջացած ջրհեղեղների հետեւանքով առնվազն երկու մարդ է զոհվել։
«Reuters»-ի փոխանցմամբ՝ աղետը հարվածել է երկրի հյուսիսային եւ արեւմտյան հատվածներին։ Արդյունքում խաթարվել է մարդատար ավտոմեքենաների և երկաթուղային տրանսպորտի երթեւեկությունը։ 16.000 բաժանորդի էլեկտրաէներգիա չի մատակարարվում:
Անձրևից հետո երկրի որոշ հատվածներում սողանքներ են տեղի ունեցել։ Փրկարարների համար դժվար է հասնել որոշ գյուղեր: Արտակարգ իրավիճակների ծառայությունը քաղաքացիներին հորդորում է փրկարարներին օգնել փչովի նավակներով։
Փրկարարական աշխատանքներին ներգրավված են մի քանի ուղղաթիռներ։ Հեղեղված տներից քաղաքացիների մի մասը տարհանվել է:
Երկրի պաշտպանության նախարարության տվյալներով՝ փրկարարներին օգնելու պատրաստակամություն է հայտնել նաեւ բանակը։
Օդերեւութաբանները կանխատեսում են, որ առաջիկա օրերին հորդառատ անձրեւներ են սպասվում նաեւ Սլովենիայի հարեւան Խորվաթիայում եւ Բոսնիայում։