Sky News – Իրանում Մինաբի աղջիկների դպրոցի վրա հարձակումը, ենթադրաբար, կապված է ԱՄՆ հետախուզության կողմից իրանական ռազմական օբյեկտների վերաբերյալ հնացած տեղեկատվության օգտագործման հետ
Sky News-ը հաղորդել է, որ ԱՄՆ հետախուզական գործակալությունները չեն կարողացել պատշաճ կերպով թարմացնել իրանական ռազմական օբյեկտների վերաբերյալ տվյալները, ինչը լուրջ խնդիրներ է առաջացրել թիրախների նույնականացման հարցում։
Լրագրողների հետաքննության համաձայն՝ ԱՄՆ-ն երկար ժամանակ պատրաստվում էր Իրանի հետ հնարավոր պատերազմի և տեղեկատվություն էր հավաքում երկրի ռազմական ենթակառուցվածքների մասին։
1987 թվականի Կենտրոնական հետախուզական վարչության գաղտնազերծված փաստաթուղթը ցույց է տալիս, որ այդ ժամանակ ԱՄՆ-ն արբանյակային պատկերների միջոցով հսկում էր Մինաբում հնարավոր ռազմական աջակցության օբյեկտը։
ԱՄՆ Պաշտպանության հետախուզական գործակալությունը ռազմական օբյեկտների վերաբերյալ տվյալները պահում և թարմացնում է հատուկ տվյալների բազայում։
Հետաքննության համաձայն՝ Կենտրոնական հրամանատարությունն օգտագործում է այս տվյալները ռազմական թիրախների ցուցակներ կազմելու համար։
ԱՄՆ ռազմական աղբյուրի խոսքով՝ տվյալները պետք է ստուգվեն յուրաքանչյուր երեքից հինգ տարին մեկ, սակայն այս գործընթացը չի իրականացվում անհրաժեշտ հաճախականությամբ։ Նրա խոսքով՝ տարեկան ստուգվում էր Կենտրոնական հրամանատարության պատասխանատվության տակ գտնվող միայն 100-200 օբյեկտ։
Ռազմական թիրախների ընտրության փորձագետ Ջեսիկա Դորսին հարվածներ հասցնելու համար հնացած տեղեկատվության օգտագործումը անվանել է «չափազանց խնդրահարույց»։
Բացի այդ, ըստ Պենտագոնի քաղաքացիական պաշտպանության կենտրոնի նախկին աշխատակից Ուես Բրայանտի, Դոնալդ Թրամփի իշխանության գալուց հետո կենտրոնում մնացել են գրեթե 40 մասնագետներից միայն յոթը։ Մինաբի դպրոցի վրա հարձակման վերաբերյալ ԱՄՆ պաշտոնական հետաքննության արդյունքները դեռևս չեն հրապարակվել։
Տեղեկատվության համար նշենք, որ Մինաբի աղջիկների դպրոցի վրա հարձակումը տեղի է ունեցել Իրանի հետ պատերազմի սկզբնական օրերին։ Թեհրանի տվյալներով՝ հարձակման ժամանակ տասնյակ ուսանողներ են զոհվել։