ԱՄՆ նախագահ Դոնալդ Թրամփի կողմից Իրանին առաջարկված 15 կետից բաղկացած խաղաղության ծրագիրը ներառում է Թեհրանի միջուկային զինաթափումը, միջուկային նյութերի հանձնումը Միացյալ Նահանգներին և Իրանի կողմից հովանավորվող խմբավորումների աջակցության դադարեցումը։

Այս մասին հայտնում է «Sky News»-ը՝ հղում անելով իսրայելական «Channel 12» հեռուստաալիքին և այլ աղբյուրների։

Մասնավորապես, 15 կետից բաղկացած ծրագիրը ներառում է.

• Իրանը պետք է ոչնչացնի իր միջուկային կարողությունները.
• Պետք է պարտավորություն ստանձնի երբեք չփորձել միջուկային զենք ստեղծել.
• Իրանն այլևս չի հարստացնի միջուկային նյութեր.
• Բոլոր հարստացված նյութերը կհանձնվեն ԱՄՆ-ին.
• Գոյություն ունեցող միջուկային օբյեկտները կոչնչացվեն, կլուծարվեն Նաթանզի, Սպահանի և Ֆորդոյի միջուկային օբյեկտները.
• Կուժեղացվի Ատոմային էներգիայի միջազգային գործակալության (ՄԱԳԱՏԷ) դերը, գործակալությունը հասանելիություն կստանա Իրանի ծրագրի հետ կապված բոլոր միջուկային տեղեկատվությանը.
• Իրանը կհրաժարվի իր հովանավորյալ խմբավորումների՝ «Հեզբոլլահի» և հութիների աջակցությունից.
• Կդադարեցնի հովանավորյալ ուժերի ֆինանսավորումն ու զինումը.
• Հորմուզի նեղուցը կբացվի, կմնա որպես ազատ ծովային գոտի և բաց կլինի ապագայում.
• Իրանը կսահմանափակի իր հրթիռների քանակն ու հեռահարությունը.
• Իրանը հրթիռները կօգտագործի միայն պաշտպանական նպատակներով։

Դրա փոխարեն.

• Իրանի դեմ պատժամիջոցները կհանվեն.
• Իրանը կմշակի քաղաքացիական միջուկային էներգիայի ծրագիր (Իրանին օգնություն կցուցաբերվի Բուշերում քաղաքացիական միջուկային նախագծի մշակման գործում)։