Բալթիկ ծովի վերևում ռուսական հետախուզական ինքնաթիռի հայտնվելու արձագանքով Շվեդիայի և Գերմանիայի ավիացիան ակտիվացել է։

Ինչպես գրում է «Associated Press»-ը, միջադեպը տեղի է ունեցել սեպտեմբերի 21-ին։ Ռուսական «Իլ-20» տեսակի ինքնաթիռը գտնվել է Բալթիկ ծովի օդային տարածքում՝ անջատված տրանսպոնդերով և առանց նախապես ներկայացված թռիչքի պլանի։ Այդ պատճառով ռուսական ինքնաթիռի նույնականացման և թռիչքի մոնիտորինգի նպատակով մոբիլիզացվել են երկու շվեդական և երկու գերմանական կործանիչներ։

Շվեդիայի ռազմական օդուժում հայտարարել են, որ նրանք շարժվում էին միջազգային օդային տարածքում։

Հիշեցնենք, որ սեպտեմբերի 19-ին Էստոնիայի արտաքին գործերի գերատեսչությունը հայտարարել էր, որ երկրի օդային տարածք են ներխուժել երեք ռուսական կործանիչներ։ Եվրոպական մի շարք երկրներ տեղի ունեցածը համարել են Ռուսաստանի կողմից դիտավորությամբ իրականացված սադրանք։ Իսկ Էստոնիայի վարչապետը ՆԱՏՕ-ի կանոնադրության չորրորդ հոդվածի ակտիվացման նախաձեռնությամբ հանդես է եկել և անցկացրել է խորհրդակցություններ դաշնակիցների հետ։