Խորհրդարանի ժամանակավոր հանձնաժողովն ուսումնասիրել է Վրաստանում FMCG (արագ սպառվող ապրանքների) ոլորտի ավելի քան 80 առաջատար ընկերությունների գործունեությունը, որոնց թվում են ինչպես արտադրողներ, այնպես էլ ներմուծողներ, դիստրիբյուտորներ և մանրածախ ցանցեր: Մենք ծանոթացել ենք նրանց բիզնես գործընթացներին, գործառնական ծախսերին, ֆինանսական վիճակին և կապիտալի կառուցվածքին: Նաև ուսումնասիրել ենք եվրոպական յոթ երկրների փորձը սննդամթերքի գնաճի դեմ պայքարի տարբեր մեթոդների վերաբերյալ, – խորհրդարանի լիագումար նիստում հայտարարել է պարենային ապրանքների, դեղորայքի և վառելիքի գնագոյացման կառուցվածքն ուսումնասիրող ժամանակավոր հանձնաժողովի նախագահ Շոթա Բերեկաշվիլին:

Նրա խոսքով՝ հանձնաժողովն ակտիվորեն աշխատում է պլանի վրա և կկազմի եզրակացություն՝ կոնկրետ հանձնարարականներով, քայլերով և կառուցվածքային փոփոխություններով, ինչը, վերջնարդյունքում, նշված ոլորտը կդարձնի խիստ մրցունակ և արդյունավետ:

«Մենք կստանանք համակարգային արդյունք, այդ թվում՝ փոփոխությունների ներդրումից անմիջապես հետո: Նաև ունենք միջնաժամկետ պլան, թե ինչպես կարելի է վերափոխել նշված ոլորտն այնպես, որ այն աշխատի արդյունավետ և չառաջացնի լրացուցիչ ծախսեր:

Կարծում ենք, որ շատ լավ կլինի կարողանալ վերահսկել նշված ոլորտը, որպեսզի այն ունենա ֆինանսական կարգապահություն: Չափազանց կարևոր է, որ գործընթացները լինեն առողջ, գոյություն ունենա առևտրային հարաբերությունների շրջանակ, որը ոլորտը կդարձնի մրցունակ և հաջողակ», – նշել է Շոթա Բերեկաշվիլին: