Շիդա Քարթլիում բոտուլիզմի դեպք է գրանցվել
Շիդա Քարթլիում սննդային բոտուլիզմի դեպք է գրանցվել։
Տեղեկատվություն այս մասին տարածում է Սննդի ազգային գործակալությունը:
«Մայիսի 20-ին Սննդի ազգային գործակալությունը Հիվանդությունների վերահսկման և հանրային առողջության ազգային կենտրոնից ծանուցում է ստացել Շիդա Քարթլիում սննդային բոտուլիզմի դեպքի հայտնաբերման մասին: Տեղեկատվությունը ստանալուց հետո գործակալության Շիդա Քարթլիի տարածաշրջանային վարչության տեսուչները սկսել են հետաքննություն: Չպլանավորված ստուգում է անցկացվել Քարելիի ապրիլի 9-ի փողոցում գտնվող «Ախալի Խորցի» խանութում, որտեղ քաղաքացին, որի մոտ հետագայում բոտուլիզմ էր ախտորոշվել, գնել է ապխտած խոզապուխտ: Մսի վաճառքի օբյեկտում («Բեսիկ Նաքիշաշվիլի» ձեռնարկություն) որևէ կրիտիկական անհամապատասխանություն չի նկատվել: Գործարարը տուգանվել է ժամկետանց սնունդ վաճառելու համար: Պետական վերահսկողություն է իրականացվել նաև ապխտած խոզապուխտ արտադրող գործարարի մոտ («Վախթանգ Լոմիձե» ձեռնարկություն, հասցե՝ Խաշուրի, Իմերեթի փողոց № 54): Ձեռնարկությունում հայտնաբերվել են մի շարք խախտումներ, այդ թվում՝ կրիտիկական անհամապատասխանություններ, որոնց պատճառով գործարարը տուգանվել է, և արտադրական գործընթացը կասեցվել է: Պարզվել է, որ ձեռնարկատերը գործել է առանց գրանցման և տնտեսական գործունեության գրանցամատյանում ճանաչվելու, խախտվել են հետագծելիության պահանջները, և HACCP համակարգը ձեռնարկությունում ներդրված չէր», – ասվում է Սննդի ազգային գործակալության հաղորդագրության մեջ։
Սննդի ազգային գործակալությունը կոչ է անում սպառողներին զերծ մնալ կասկածելի պայմաններում պատրաստված/ապխտած մսի, ձկան և պահածոյացված սննդի օգտագործումից։
«Բոտուլիզմը սուր տոքսիկ-վարակիչ հիվանդություն է, որը բնութագրվում է ծանր ընթացքով: Բոտուլիզմի կանխարգելման համար կարևոր է պահպանել սանիտարական և տեխնոլոգիական ռեժիմը սննդամթերքի պահպանման ժամանակ», – ասվում է Սննդի ազգային գործակալության հաղորդագրության մեջ: