Պարոն նախագահին վերահաստատեցինք իշխանությունների պատրաստակամությունը քաղաքական ուժերի հետ երկխոսելու վերաբերյալ, որպեսզի հնարավորինս շուտ կարգավորենք քաղաքական գործընթացները և համատեղ ջանքերով պայքարենք մարտահրավերների դեմ, հոգանք մեր երկրի կայուն զարգացման համար, – այս մասին Եվրոպական խորհրդի նախագահի հետ հանդիպումից հետո հայտարարել է Վրաստանի վարչապետ Իրակլի Ղարիբաշվիլին:

Իրակլի Ղարիբաշվիլին խոսել է այն հարցերի մասին, որոնք քննարկել է Շառլ Միշելի հետ:

«Ես կրկին շնորհակալություն եմ հայտնում պարոն Շառլ Միշելին: Մենք գոհ ենք նրա այցից: Նրա այցը շատ կարևոր հաստատում է մեր երկրի բարեկամի կողմից: Սա Եվրամիության բարձրաստիճան պաշտոնյայի առաջին այցն է Վրաստան, ինչը ևս մեկ անգամ ապացուցում է, որ Վրաստանը Եվրամիության համար կարևոր գործընկեր է: Կցանկանայի նշել նաև, որ գլոբալ համավարակի համատեքստում այս այցը ցույց է տալիս Եվրամիության պատրաստակամությունը, շարունակել աջակցել Վրաստանին բարդ բարեփոխումների ճանապարհին, որոնք պետք է տանեն դեպի Եվրամիության լիիրավ անդամակցություն: Մենք պարոն նախագահին վերահաստատեցինք Վրաստանի և վրաց ժողովրդի ձգտումները դեպի եվրոպական արժեքներ: Ուզում եմ նշել, որ մենք շատ բեղմնավոր զրույց ունեցանք: Մենք անդրադարձել ենք մեր երկրին հուզող մի շարք հարցերի: Նշվեց նաև, որ եվրոպական ընտանիքին անդամակցությունը ոչ միայն քաղաքական տեսլականի մաս է, այլև վրաց ժողովրդի պատմական ընտրություն, և մենք հավատարիմ ենք այդ արժեքներին», – հայտարարել է Ղարիբաշվիլին:

Նրա խոսքով, հանդիպմանը քննարկվել են նաև երկկողմ համագործակցության հարցեր:

«Հանդիպման ընթացքում մենք քննարկեցինք նաև երկկողմ համագործակցության օրակարգի հարցերի լայն շրջանակ: Ուշադրություն է դարձվել երկրում ստեղծված քաղաքական իրավիճակի վրա: Մենք նախագահին վերահաստատեցինք իշխանությունների պատրաստակամությունը քաղաքական ուժերի հետ երկխոսելու վերաբերյալ, որպեսզի հնարավորինս շուտ կարգավորենք քաղաքական գործընթացները և համատեղ ջանքերով պայքարենք մարտահրավերների դեմ, հոգանք մեր երկրի կայուն զարգացման համար», – ասել է Ղարիբաշվիլին: