Սովորական թարգմանություն

Վրաստանի խորհրդարանի նախագահ Շալվա Պապուաշվիլիի հայտարարության համաձայն՝ մի քանի օր առաջ կրկին գրավոր դիմել է Վրաստանում Եվրոպական միության դեսպան Պավել Հերչինսկիին։

«Մի քանի օր առաջ կրկին գրությամբ դիմեցի Վրաստանում ԵՄ դեսպան Պավել Հերչինսկիին, որտեղ ևս մեկ անգամ ուշադրություն հրավիրեցի մտահոգիչ իրողության վրա, երբ ԵՄ-ի անունն ու ֆինանսավորումը օգտագործվում են ատելության, բռնության և քարոզչության նպատակներով», – գրել է Շալվա Պապուաշվիլին «Ֆեյսբուք»-ի իր էջում։

Պապուաշվիլին սոցիալական ցանցում հրապարակել է նշված գրությունը՝ ասելով.

«Ցանկանում եմ հիասթափությունս հայտնել, որ Վրաստանում ԵՄ-ի առաքելությունը հրապարակայնորեն չի դատապարտել վիրավորանքների ընթացիկ արշավն ու Վրաստանի խորհրդարանի և կառավարության ներկայացուցիչների նկատմամբ ագրեսիվ հարձակումները՝ այն անձանց կողմից, ում ֆինանսավորում են ԵՄ-ն և դրա անդամ պետությունները։ Ցավալի է, որ ԵՄ առաքելության անգործությունը՝ նրանց նկատմամբ, ովքեր գործում են եվրոպական արժեքների դեմ և ստանում են ֆինանսավորում Եվրոպական միությունից, ստեղծում է այնպիսի միջավայր, որն նպաստավոր հող է դառնում ատելության, բռնության և քաղաքական բևեռացման համար։ Խորը հիասթափեցնող է, որ Վրաստանի կառավարության բազմակի կոչերի, ներառյալ իմ վերջին գրության պայմաններում, ԵՄ առաքելությունը խուսափում է իրեն հստակորեն հեռու պահել այն ատելության և բռնության դրսևորումներից, որոնք գալիս են ԵՄ-ի կողմից ֆինանսավորվող խմբերից։

Ինչպես նշել էի նախորդ գրությամբ, փորձը ցույց է տալիս, որ նման վարքագծին չարձագանքելը ֆինանսավորողների կողմից այդ խմբերին հնարավորություն է տալիս ընկալել ԵՄ առաքելության անգործությունը որպես «կանաչ լույս»՝ հետագա բռնի գործողությունների համար։ Ստեղծվում է տպավորություն, թե ատելությունն ու բռնությունը կարող են արդարացվել «եվրոպական արժեքների» անունից։

Ավելին՝ մտահոգիչ է, որ ատելության, բռնության և քարոզչության դատապարտման փոխարեն մենք լսում ենք աջակցող հայտարարություններ այն խմբերի հասցեին, որոնք հանդիսանում են ատելության, բռնության և քարոզչության կազմակերպիչներ։

Իմ նախազգուշացումը, որ անգործությունը ընկալվելու է որպես «կանաչ լույս», արագ արդարացավ։ Մենք ականատես եղանք, թե ինչպես մայիսի 9-ին Եվրոպական միության առաքելության կողմից կազմակերպված Եվրոպայի օրվա ժամանակ հարձակում գործեցին լրագրողի վրա այն հրավիրյալ հյուրերը, որոնք հայտնի են որպես ԵՄ-ի ֆինանսավորման ստացորդներ։ Ցավոք, նույնիսկ դրանից հետո այդ միջադեպի հրապարակային դատապարտում չենք լսել։

Մայիսի 17-ին, կրկին «եվրոպական արժեքների» անվան տակ, մանկահասակ երեխաների ներկայությամբ հարձակվեցին խորհրդարանի անդամ Մարիամ Լաշխիի վրա և հասցրին խոսքային վիրավորանք՝ նույն անձանց կողմից, ում աջակցություն էին արտահայտել եվրոպացի ներկայացուցիչները։

Մայիսի 22-ին, կրկին «եվրոպական արժեքների» հիշատակմամբ, արդարացվել է խորհրդարանի անդամ Իրակլի Զարքուայի դեմ խոսքային հարձակումն ու սպառնալիքը՝ երկու անձանց կողմից, ովքեր հայտնի են որպես ԵՄ ֆինանսավորմամբ օգտվողներ։

Իմ նախորդ գրությամբ նշել էի այն վտանգների մասին, որոնք բխում են նման ծայրահեղ գործողությունների չդատապարտելուց, ինչը ոչ միայն խթանում է քաղաքական բևեռացումը, այլև սպառնում է վրացական ժողովրդավարությանը։ Արդեն տեսնում ենք, որ նման լռությամբ խրախուսվող խմբերը մոտեցել են այն կետին, որից այն կողմ ծայրահեղականությունն է, և որտեղից ետ դառնալ հնարավոր չի լինի։

Վերջին մի քանի շաբաթվա ընթացքում տեսնում ենք, որ ԵՄ-ի կողմից ֆինանսավորվող հասարակական կազմակերպությունները իրենց հայտարարություններում և փաստաթղթերում սկսել են հերքել Վրաստանի ժողովրդավարական ճանապարհով ընտրված իշխանության լեգիտիմությունը և տարածել արտահայտություններ, ինչպիսիք են «ոչ լեգիտիմ» և «ինքնահռչակված» խորհրդարան և կառավարություն։ Ժողովրդի կողմից ընտրված խորհրդարանը «ոչ լեգիտիմ» անվանելը և ժողովրդավարական ինստիտուտների չճանաչելը ինքնին ժողովրդավարության հերքում է։ Այս քարոզարշավի համակարգված բնույթը վկայում է, որ առկա է գաղափարական հիմք՝ լեգիտիմ կառավարությունը ոչ ժողովրդավարական մեթոդներով փոխելու նախապատրաստման համար»,- ասված է Շալվա Պապուաշվիլիի նամակում։