ԱՄՆ-ի կողմից 66 կազմակերպություններից դուրս գալը՝ հիմնավորմամբ, թե դրանք անօգուտ, փող վատնող կազմակերպություններ են, ևս մեկ անգամ հաստատում է այն, ինչ մենք ասում էինք, որ միջազգային կարգը այլևս գոյություն չունի, – այս մասին հայտարարել է Վրաստանի խորհրդարանի նախագահ Շալվա Պապուաշվիլին։

Ինչ վերաբերում է կոնկրետ Վենետիկի հանձնաժողովին, Պապուաշվիլու գնահատմամբ՝ Վենետիկի հանձնաժողովը դարձել է քաղաքական գործիք՝ օգտագործվող երկրների դեմ։

«ԱՄՆ-ն լքել է 66 կազմակերպություն։ Դա ևս մեկ անգամ հաստատում է այն, ինչի մասին մենք խոսում էինք, որ Երկրորդ համաշխարհային պատերազմից հետո ստեղծված միջազգային կարգը այլևս գոյություն չունի։ Այդ կարգի մաս են կազմում տարբեր միջազգային կազմակերպություններ, սակայն այդ կազմակերպությունների շրջանակում հարցերի քննարկման գործընթացը խաթարված է։ Ամերիկան դուրս է գալիս այն հիմնավորմամբ, որ դրանք անօգուտ, փող վատնող կազմակերպություններ են, ինչը ինքնին ցույց է տալիս, որ դրանց լրջությունը կասկածի տակ է։ Սա ևս մեկ անգամ հաստատում է մեր պնդումը, որ միջազգային կարգը վերացել է։ Վենետիկի հանձնաժողովը դարձել է քաղաքական զենք՝ ուղղված երկրների դեմ՝ տարբեր գործիքներ և ինստիտուտներ պարտադրելու համար, որոնք բխում են տարբեր քաղաքական օրակարգերից։ Վրաստանի դեպքում սա բազմիցս ակնհայտ է եղել, երբ իրավական եզրակացությունների և կարծիքների փոխարեն մենք տեսել ենք քաղաքական բնույթի եզրակացություններ ու կարծիքներ։ Սա հստակ երևում է Վենետիկի հանձնաժողովի զեկույցներում, ինչի մասին մենք նաև հայտնել ենք հանձնաժողովի հետ հանդիպումների ընթացքում։ Մենք Եվրոպայի խորհրդի անդամ ենք, և Վենետիկի հանձնաժողովը այդ կազմակերպության մի ինստիտուտն է։ Մեզ համար, որպես այդ կազմակերպության անդամ պետություն, մտահոգիչ է, որ Վենետիկի հանձնաժողովը փոխել է իր բնույթը և իրավաբանական, մասնագիտական եզրակացությունների կազմման փոխարեն վերածվել է սովորական քաղաքական մեկնաբանի, որն իր կարծիքները և եզրակացությունները ներկայացնում է քաղաքական օրակարգից ելնելով։ ԱՄՆ-ն դա հենց այսպես էլ հաստատեց՝ լքելով Վենետիկի հանձնաժողովը՝ հիմնավորելով, որ այն անօգուտ, փող վատնող կազմակերպություն է։ Սա էլ ավելի ամրապնդում է մեր տեսակետը, որ Վենետիկի հանձնաժողովը շեղվել է իր նախնական առաքելությունից», – հայտարարել է Պապուաշվիլին։

Հիշեցնենք, որ ԱՄՆ նախագահ Դոնալդ Թրամփը ստորագրել է նախագահական հուշագիր, որը նախատեսում է ԱՄՆ-ի դուրս գալը 66 միջազգային կազմակերպությունից։ Այդ կազմակերպությունների շարքում է նաև Եվրոպայի խորհրդի Վենետիկի հանձնաժողովը։

ԱՄՆ պետքարտուղար Մարկո Ռուբիոն սոցիալական ցանց X-ում գրել է. «Մենք դադարեցնում ենք գլոբալիստ բյուրոկրատների ֆինանսավորումը, ովքեր գործում են մեր շահերին հակառակ»։