Վրաստանի խորհրդարանի նախագահ Շալվա Պապուաշվիլիի հայտարարությամբ՝ Թուրքիայում Միջխորհրդարանական միության (IPU) 152-րդ վեհաժողովում իր ելույթի ժամանակ կխոսի արտաքին միջամտության սպառնալիքների դեմ միասնական մոտեցման անհրաժեշտության մասին։

Նրա խոսքով՝ Եվրամիության անդամ երկրների ներկայացուցիչների հետ քննարկումներ կանցկացվեն Վրաստան-Եվրամիություն հարաբերությունների և առկա ցավալի իրողության շուրջ։

«Այսօր կլինի վեհաժողովի հիմնական օրը, երբ մենք հնարավորություն կունենանք հանդիպումներ անցկացնել երկկողմ ձևաչափով, այդ թվում՝ հանդիպում կկայանա Լյուքսեմբուրգի խորհրդարանի նախագահի, տարածաշրջանի խորհրդարանների նախագահների հետ։ Հնարավորություն կլինի ելույթով դիմել վեհաժողովին։ Կոնֆերանսում մեր հիմնական ասելիքն այն նոր սպառնալիքներն են, որոնք լավ երևում են բոլոր երկրներում։ Բոլոր երկրները փորձում են պաշտպանել սեփական ազգային շահերը արտաքին միջամտություններից, և այդ առումով ես կխոսեմ միասնական մոտեցման անհրաժեշտության մասին, որպեսզի արտաքին միջամտության հիբրիդային սպառնալիքներին տրվի միասնական պատասխան։ Եվրամիության անդամ երկրների ներկայացուցիչների հետ քննարկում կլինի Վրաստան-Եվրամիություն հարաբերությունների, այն ցավալի իրողության մասին, որը տեսնում ենք Բրյուսելի կողմից։ Ցավոք, նրանք փակում են երկխոսության ռեժիմը, և գերակշռում է միակողմանի դիրեկտիվների մոտեցումը, որն ավելի ու ավելի հզոր է դառնում Բրյուսելում։ Ուստի կարևոր է մեր ձայնը հասցնել Եվրամիության անդամ երկրների խորհրդարաններին և ցույց տալ, որ այն ուղին, որն այսօր ընտրել է Բրյուսելը Վրաստանի և թեկնածու երկրների նկատմամբ, լիովին շեղված է եվրոպական արժեքներից։ Կարևոր է, որ եվրոպական խորհրդարաններն այս առումով նաև սեփական դիրքորոշումները ցույց տան»,- հայտարարել է Շալվա Պապուաշվիլին։