Շալվա Պապուաշվիլի. Գերմանիայի դեսպանին և պետությանը հարցը պարզ է. արդյո՞ք դեսպանը մտադիր է շարունակել պայմանագրային հարաբերությունները միջազգային ճանաչում ունեցող խաբեբա Խազարաձեի հետ
Մամուկա Խազարաձեն զբաղվում է բիզնեսով միայն այն դեպքում, երբ իշխանության կողմից ստեղծված «ջերմոցային» պայմաններ ունի․ երևում է, որ իր բիզնեսն այդպես է կառուցված, այդպես էլ հարստացել է։ Նույնիսկ սեփական բնակարանի վարձակալության հարցը չի կարողանում նորմալ կարգավորել՝ ոչ իրավական, ոչ ֆինանսական առումով․ պարզ երևում է, որ թաքցնում էր հարկերը, – այս մասին հայտարարել է Վրաստանի խորհրդարանի նախագահ Շալվա Պապուաշվիլին։
Նրա խոսքով՝ միջազգային, ներքին, մարդկային, դիվանագիտական և ցանկացած մակարդակում հաստատվել է Մամուկա Խազարաձեի խաբեբայությունը։
«Հաստատվեց, որ «Լելո»-ն ստեղծվել է խաբեբայության նպատակով և նրա նպատակն էր պետական բյուջեից գումար հափշտակելը։ Նրա անդամներն ու աջակիցները պետք է մտածեն, որ իրենք խաբեբայության մասնակիցներ են։ Ինչ վերաբերում է Գերմանիայի դեսպանի և Մամուկա Խազարաձեի միջև կնքված պայմանագրին, այն պահին, երբ դեսպան Ֆիշերը Գերմանիայի անունից պայմանագիր էր կնքում Մամուկա Խազարաձեի հետ 2022 թվականի աշնանը, Մամուկա Խազարաձեն արդեն դատապարտված էր խաբեբայության համար և արդեն հրաժարվել էր խորհրդարանի մանդատից։ Ցանկացած սահմանմամբ, դեսպանը պետք է խուսափեր այդպիսի մարդու հետ պայմանագիր կնքելուց․ դա միջազգային ստանդարտ է։ Ես անձամբ աշխատել եմ Գերմանիայի կառավարության ծրագրում տարիներ շարունակ, և սկզբում մեզ սահմանափակում էին քաղաքականապես ակտիվ անձանց հետ պայմանագիր կնքելու հարցում, իսկ հետո դա ընդհանրապես արգելված էր, քանի որ այդ դեպքում կոռուպցիոն ռիսկեր են առաջանում։ Սա կամ դեսպանի դիտավորյալ քայլն էր՝ իմանալով, որ պայմանագիր է կնքում անհուսալի անձի հետ, կամ էլ նրա անփութության հետևանք, որի արդյունքում Գերմանիայի պետությունը ներքաշվեց հարկերի թաքցման սկանդալի մեջ։ Բացի այդ, այսօր պարզ դարձավ, որ գույքի հայտարարագրում, որը Խազարաձեն լրացրել է հունվարին, նշված չէ այդ վարձակալված գույքից ստացված եկամուտը, և նշված չէ նաև պայմանագիրը։ Սա ևս մեկ ստի ապացույց է։ Այսպիսով, Գերմանիայի դեսպանի և Գերմանիայի պետության առջև հարցը պարզ է․ ի՞նչ են պատրաստվում անել հիմա․ շարունակելու՞ են պայմանագրային հարաբերությունները միջազգային մակարդակով ճանաչված խաբեբայի և ծայրահեղական քաղաքական գործչի հետ։ Եվ հետո նորից պատրաստվում են ինչ-որ բարոյական դիրքից խոսե՞լ վրաց ժողովրդի հետ», – հայտարարել է Պապուաշվիլին։
Վրաստանի եկամուտների ծառայությունը այսօր հայտարարություն է տարածել Մամուկա Խազարաձեի ընտանիքին պատկանող անշարժ գույքը Գերմանիայի դեսպանին վարձով տալու հարցի վերաբերյալ։ Ինչպես նշված է հայտարարությունում, հարցի վերլուծության ժամանակ հայտնաբերվել է հնարավոր հարկային օրենսդրության խախտում, ինչի պատճառով եկամուտների ծառայությունը սկսել է փաստերի ուսումնասիրման գործընթացը։
Որոշ ժամանակ անց Մամուկա Խազարաձեն սոցիալական ցանցում հրապարակում է կատարել՝ նշելով, որ «Պիտեր Ֆիշերի հետ կնքված վարձակալության պայմանագրի հետ կապված հարկի հարց է ի հայտ եկել», և այս պահին գումարը ամբողջությամբ վճարված է։
