Լեհաստանի Կրակով քաղաքի գլխավոր հրապարակում վեց մարդու սպանած հրաձիգը մահացել է հիվանդանոցում
Լեհաստանի Կրակով քաղաքի գլխավոր հրապարակում վեց մարդու սպանած հրաձիգը մահացել է հիվանդանոցում, հաղորդում է «Սի Էն Էն»-ը։
Ոստիկանությունը կրակել է հարձակվողի ուղղությամբ, նրան տեղափոխել են հիվանդանոց, որտեղ նա մի քանի վիրահատության է ենթարկվել։
Դեպքի պատճառով մինչև նոյեմբերի 11-ը հայտարարվել է ազգային սուգ, և անվտանգության միջոցառումները խստացվել են։ Իշխանությունների տվյալներով՝ հարձակումը, հավանաբար, պայմանավորված է եղել ծայրահեղ աջ գաղափարախոսությամբ։
Ոստիկանության տվյալներով՝ 25-ամյա լեհ քաղաքացին մեքենայով մխրճվել է Կրակովի գլխավոր հրապարակ և սկսել անխտիր կրակել։
Կրակոցի հետևանքով զոհվել է վեց մարդ, 16-ը՝ վիրավորվել, այդ թվում՝ երկու ոստիկան, որոնց վիճակը կայուն է, իսկ վիրավորների թվում են հինգ օտարերկրացիներ։
Բացի այդ, հարձակվողի տանը՝ լեհական Օստրովեց-Սվենտոկրշիսկե քաղաքում, հայտնաբերվել է երեք դի։ Ոստիկանությունը հայտնել է, որ մահացածները նրա քույրը, մայրը և հայրն են։ Դատախազությունը հայտարարել է, որ «շատ հավանական է», որ նույն անձը կատարել է սպանությունները երկու վայրերում էլ, սակայն հետաքննությունը շարունակվում է։
Ոստիկանությունը հանցագործության վայրերից առգրավել է 11 միավոր հրազեն։
Լեհաստանի պաշտպանության նախարար Վլադիսլավ Կոսինսկա-Կամիշը հերքել է այն տեղեկությունները, որ հարձակվողը զինվոր է եղել՝ ասելով, որ «երբեք որևէ կապ չի ունեցել բանակի հետ»։