«Ընդդիմությունը գլխավոր խնդիր ունի՝ նրանք ապրում են ուրիշի կյանքով», – այս մասին Թուրքիայում վրացի լրագրողներին հայտարարել է Վրաստանի խորհրդարանի նախագահ Շալվա Պապուաշվիլին։

Պապուաշվիլիի խոսքով՝ ընդդիմությունն իրեն կինոյի մեջ է զգում և դառնում է այլ երկրներում տեղի ունեցող գործընթացների մասնակիցը։

«Նայում են Վենեսուելային և դառնում են վենեսուելացիներ, նայում են Հունգարիային և դառնում են հունգարացիներ, նայում են ուկրաինացիներին և դառնում են ուկրաինացիներ և այլն։ Նրանք կտրված են իրենց երկրից, իրենց ընտրողներից և մի խումբ են, որն ապրում է ուրիշի կյանքով։ Իրենց կինոյի մեջ են զգում, այն ամենին, ինչ տեղի է ունենում դրսում, նայում են որպես կինոյի և իրենց համարում են այդ կինոյի մասնակիցներ։ Նրանք հաճախ մասնակիցն են լինում այն գործընթացների, որոնք տեղի են ունենում այլ երկրում։ Նրանք ունեն որոշակի տեսակի խանգարում այն առումով, որ դառնում են այլ տեղերում ընթացող գործընթացների մասնակիցը և կտրվում են առկա իրականությունից։ Այսքան տարի չհասկացան, որ սա այն ճանապարհը չէ, որով շահում են ընտրողի սիրտը։ Նրանք պարզապես դիտում են հերթական սերիան։ Այս սերիայում հարցը վերաբերում է Հունգարիային, որտեղ խորհրդարանական ընտրությունների միջոցով հաղթեց ընդդիմությունը։ Նախորդ սերիայում՝ Վենեսուելայում, արտաքին միջամտությամբ նախագահին դուրս հանեցին երկրից, և այն ժամանակ նրանք այդ սցենարի կողմնակիցն էին։ Պարզապես դիտում են այս սերիալը, այս անգամ սա նրանց համար «սեզոնն» է։ Այլ տեղում մի ուրիշ բան կպատահի, և նրանք այդպես կվերադասավորվեն։ Նրանք սեփական օրակարգ, կարծիք, քաղաքականություն չունեն, նրանք ուրիշից կախված և ուրիշին հետևող խումբ են», – հայտարարել է Շալվա Պապուաշվիლին։