Ռուսաստանի Անվտանգության խորհրդի քարտուղար Սերգեյ Շոյգուն ասում է, որ այսպես կոչված Զանգեզուրի միջանցքը և Հյուսիս-Հարավ տրանսպորտային միջանցքը չեն մրցակցելու միմյանց հետ։

Ռուսական լրատվամիջոցների փոխանցմամբ՝ Շոյգուն այս հայտարարությունն արել է Անկախ Պետությունների Համագործակցության Անվտանգության խորհրդի քարտուղարների նիստում։

«Ես կարծում եմ, որ երկու երթուղիներն էլ իրավունք ունեն գոյատևելու. դրանք անհրաժեշտ են Ադրբեջանը նրա տարածաշրջանների հետ կապելու համար։ Երկու երկրների միջև առևտրի համար ի հայտ են եկել տրանսպորտային միջանցքներ», – ասել է Շոյգուն։

Շոյգուի խոսքով՝ Հյուսիս-Հարավ միջանցքը հարավային նավահանգիստները Հյուսիսային Սառուցյալ օվկիանոսի, Հյուսիսային ծովային ճանապարհի հետ կապելու միջոց է։

«Ես դրանում որևէ վատ բան չեմ տեսնում։ Ես որևէ մրցակցություն չեմ տեսնում այն ​​բանում, որ ինչ-որ մեկը բեռներ տեղափոխի այլ կերպ», – ասել է Ռուսաստանի Անվտանգության խորհրդի քարտուղարը։