Սերգեյ Նարիշկին. Եվրասիայում լայնածավալ հակամարտության վտանգը իրական է
Ռուսաստանի արտաքին հետախուզության ծառայության տնօրեն Սերգեյ Նարիշկինը հայտարարել է, որ Եվրասիայում լայնածավալ հակամարտության ռիսկը իրական է, հաղորդում է ՏԱՍՍ-ը։
«Ամբողջ եվրասիական տարածքում լայնածավալ հակամարտության ռիսկը բավականին իրական է, և սա լուրջ մտահոգության առարկա է։ Մեր տվյալներով՝ եվրոպացի առաջնորդները հավատում են վերահսկվող սրման և եզրին հավասարակշռության ռազմավարությանը, որը մշակել են արևմտյան հետախուզական ծառայությունները դեռևս անցյալ դարում», – ասել է Նարիշկինը ԱՊՀ անդամ պետությունների անվտանգության և հետախուզական ծառայությունների ղեկավարների XXII հանդիպման ժամանակ, որը նվիրված է հետախուզության հարցերին։
Նարիշկինի խոսքով՝ արևմտյան քաղաքական գործիչների կողմից գործարկված քարոզչական մեխանիզմները ստեղծում են աշխարհի այնպիսի կոշտ պատկեր, որ իրենք են դառնում այդ պատկերի պատանդները և ընկնում իրենց սեփական թակարդը։
«Այս իրավիճակում դիվանագիտությունն այլևս չի գործում, և պետությունները բառացիորեն հայտնվում են տոտալ պատերազմի մեջ, որը հաճախ ավարտվում է բոլորի համար կործանարար հետևանքներով», – նշել է Նարիշկինը։
«Մենք պարտավոր ենք կանխել իրադարձությունների նման զարգացումը։ Բարեբախտաբար, պատմությունը գիտի էսկալացիայի պարույրից հաջող ելքերի օրինակներ, թեև ոչ շատ։ Ամենացայտուն օրինակներից մեկը Կարիբյան ճգնաժամն է, երբ մեր ընդհանուր մեծ երկիրը՝ Խորհրդային Միությունը և Միացյալ Նահանգները, կարողացան փոխադարձ զիջումների գնալ և խուսափել միջուկային պատերազմից», – ասաց Նարիշկինը։