Սերգեյ Լավրով. Դոնալդ Թրամփը շատ բարեհամբույր է քննարկումներում, բայց դա չի նշանակում, որ նա ռուսամետ է, ինչպես ոմանք փորձում են ներկայացնել

ՌԴ ԱԳ նախարար Սերգեյ Լավրովի խոսքով՝ Ուկրաինայում հիպերձայնային հրթիռի կիրառման նպատակն էր ցույց տալ Արևմուտքին, որ Մոսկվան պատրաստ է օգտագործել ցանկացած միջոց՝ «ռազմավարական ձախողումից» խուսափելու համար։

Այս մասին «Fox News»-ի նախկին հաղորդավար Թաքեր Կարլսոնին տված հարցազրույցում ասել է ՌԴ ԱԳՆ ներկայացուցիչը։

«ԱՄՆ-ը և նրա դաշնակիցները, որոնք հեռահար զենք են տրամադրում Կիևի ռեժիմին, պետք է հասկանան, որ մենք պատրաստ ենք օգտագործել ցանկացած միջոց՝ կանխելու այն, ինչ նրանք անվանում են «Ռուսաստանի ռազմավարական ձախողումը», – ասել է Սերգեյ Լավրովը։

Լավրովի խոսքով, Արևմուտքի համար «շատ լուրջ սխալ» է ենթադրել, որ Ռուսաստանը կարմիր գծեր չունի, կամ դրանք «կրկին ու նորից հետ են քաշվելու»։

Դոնալդ Թրամփի մասին լրագրողի հարցին ի պատասխան՝ Լավրովը Թրամփին անվանել է «շատ բարեկամական», սակայն հերքել է այն միտքը, որ Թրամփը «ռուսամետ է»։

«Իմ տպավորությամբ՝ նա շատ բարեհամբույր է քննարկումներում, բայց դա չի նշանակում, որ նա ռուսամետ է, ինչպես ոմանք փորձում են ներկայացնել։ Պատժամիջոցների թիվը, որոնք մենք ստացել ենք Թրամփի վարչակազմի օրոք, շատ, շատ, շատ մեծ էր»,- հավելել է ՌԴ ԱԳ նախարարը։