Ռուսաստանին պետք է հստակ ուղերձ հղել, որ Ուկրաինան մենակ չի մնա, սա ներառում է ոչ միայն քաղաքական ուղերձներ, այլ նաև կոնկրետ գործողություններ, այդ թվում՝ պատժամիջոցներ. Դմիտրո Կուլեբա
Ուկրաինայի արտաքին գործերի նախարար Դմիտրո Կուլեբան կոչ է արել պատժամիջոցներ սահմանել Ռուսաստանի դեմ։
Եվրամիության արտաքին գործերի նախարարական նիստում Ուկրաինայի արտգործնախարարն ասել է, որ Եվրամիությունը պետք է գործնական քայլեր ձեռնարկի Ռուսաստանի դեմ։
«Ռուսաստանին պետք է հստակ մեսիջ ուղարկել, որ մենք չենք հանդուրժի այս էսկալացիան, Ուկրաինան մենակ չի մնա։ Սա ներառում է ոչ միայն քաղաքական ուղերձներ, այլ նաև շատ կոնկրետ գործողություններ, ինչպիսիք են աջակցությունը Ուկրաինայի պաշտպանության ոլորտի զարգացմանը, աջակցությունը Ուկրաինայի կիբերանվտանգությանը և որոշ պատժամիջոցների սահմանմանը: Սա ուղերձ է, որը ես կփոխանցեմ իմ գործընկերներին։ Մենք կարծում ենք, որ այժմ կան լավ և օրինական պատճառներ՝ գոնե որոշ պատժամիջոցներ կիրառելու համար, որպեսզի ցույց տան, որ Եվրամիությունը ոչ միայն խոսում է պատժամիջոցների մասին, այլև գործում է», – ասել է Կուլեբքն։
Ուկրաինայի արտգործնախարարը խոսել է նաև ԱՄՆ-ի և Ռուսաստանի նախագահների ծրագրված հանդիպման մասին և ասել, որ Կիևը կոնկրետ արդյունքներ է ակնկալում այդ հանդիպումից։
«Այսօր ես խոսեցի պետքարտուղար Բլինկենի հետ, ով ինձ տեղեկացրեց Բայդեն-Պուտին գագաթնաժողովի մասին։ Մենք ողջունում ենք այս նախաձեռնությունը։ Մենք կարծում ենք, որ դիվանագիտական լուծման հասնելու բոլոր ջանքերն արժե օգտագործել։ Պետքարտուղար Բլինկենն ինձ վստահեցրեց, որ Ուկրաինայի վերաբերյալ որևէ որոշում չի ընդունվի Ուկրաինայի թիկունքում: Մենք համակարգում ենք ԱՄՆ-ի հետ դիրքորոշումները համաձայնեցնելու և մեր շահերը հաշվի առնելու համար։ Մենք, ովքեր շատ ենք ցանկանում խուսափել պատերազմից, հուսով ենք, որ հանդիպումից հետո երկու նախագահները համաձայնության կգան, որ Ռուսաստանը դուրս կբերի իր ուժերը Ուկրաինայից»,- ասել է Դմիտրո Կուլեբան։