Ռուս ընդդիմադիրը մահացած է գտնվել Վարշավայում
Լեհական լրատվամիջոցների հաղորդմամբ՝ «Ժողովրդական պատգամավորների կոնգրես» ռուսական ընդդիմադիր խմբի անդամ Սերգեյ Վլասենկոն մահացած է գտնվել Վարշավայի Մոկոտով շրջանի բնակարաններից մեկում: Վարշավայի շրջանային դատախազության ներկայացուցիչ Պյոտր Անտոնի Սկիբայի խոսքով՝ այս փուլում չկան որևէ նշան, որ 71-ամյա տղամարդու մահը պայմանավորված է այլ անձանց գործողություններով:
«Վաղը նախատեսված են մասնագիտացված թեստեր, ոչ միայն դիահերձում, այլև տոքսիկոլոգիական վերլուծություն: Այս փուլում չկան որևէ նշան, որ տղամարդու մահը պայմանավորված է այլ անձանց գործողություններով կամ անգործությամբ», – ասել է Սկիբան:
Լրատվամիջոցների հաղորդագրությունների համաձայն՝ Սերգեյ Վլասենկոն 1980-ականներին Հեռավոր Արևելքում տեղական խորհրդի անդամ էր: Ավելի ուշ նա ապրել է Ռուսաստանի հարավում գտնվող Անապայում: Ուկրաինայի դեմ լայնածավալ պատերազմի սկսվելուց հետո նա Ռուսաստանից մեկնել է Լեհաստան՝ սկզբում տուրիստական վիզայով, ապա այնտեղ քաղաքական ապաստան է ստացել: