Ռոյթերս. Դոնալդ Թրամփի խաղաղության ջանքերին չնայած, Վլադիմիր Պուտինը, հավանաբար, կսրացնի պատերազմը Ուկրաինայում
ԱՄՆ նախագահ Դոնալդ Թրամփի խաղաղության ջանքերին հակառակ, Ռուսաստանի նախագահ Վլադիմիր Պուտինը, հավանաբար, կսրացնի պատերազմը Ուկրաինայում, հաղորդում է Reuters-ը՝ հղում անելով դիվանագիտական աղբյուրին։
Կրեմլին մոտ կանգնած երեք աղբյուրներ Reuters-ին հայտնել են, որ Վլադիմիր Պուտինը մերժում է Կիևի հետ խաղաղության բանակցությունների կոչերը։
Ռոյթերսը հաղորդում է, որ Ուկրաինայի կողմից ռուսական նավթավերամշակման գործարանների և նավահանգիստների վրա վերջերս կատարված հարձակումները ամրապնդել են նրա վճռականությունը՝ առայժմ շարունակել պայքարը։
Անանուն մնալու պայմանով խոսող երկու աղբյուրները նշել են, որ Պուտինը, հավանաբար, կսրացնի հակամարտությունը։ Նրանցից մեկը, որը պարբերաբար հանդիպում է Ռուսաստանի նախագահի հետ, ասել է, որ առաջիկա ամիսներին սրման մեծ հավանականություն կա։
Աղբյուրի խոսքով՝ Պուտինը վերջերս քննադատել է խորհրդականների մի խմբի, որոնք առաջարկել են փոխզիջում՝ հիմնված ներկայիս առաջնագծում հրադադարի վրա։ Մեկ այլ աղբյուր ասել է, որ Պուտինը կարծում է, որ Ռուսաստանը շուտով կգրավի Դոնբասը։