Պիտեր Սիյարտո. Մեզ դուր չի գալիս Բրյուսելի գործողությունները Թբիլիսիի նկատմամբ, մենք ցանկանում ենք, որ Եվրոպական Միությունը գործի արդարորեն՝ առանց կրկնակի ստանդարտների
«Մեզ դուր չի գալիս Բրյուսելի վերաբերմունքը Թբիլիսիի նկատմամբ։ Ցանկանում ենք, որ Եվրոպական Միությունը գործի արդար կերպով՝ առանց կրկնակի ստանդարտների», – այս մասին Անթալիայում վրացի լրագրողներին հայտարարել է Հունգարիայի արտգործնախարար Պիտեր Սիյարտոն։
«Երբ ընտրություններում աջակողմյան քաղաքական գործիչներն են հաղթում, Բրյուսելում սկսում են խոսել ժողովրդավարության առջև կանգնած վտանգների մասին։ Նրանք ժողովրդավարություն են համարում միայն լիբերալների իշխանությունը։ Սա վատ է, և մենք կփորձենք իրավիճակը փոխել դեպի լավը», – նշել է Սիյարտոն։
Բացի այդ, նրա խոսքով, Դոնալդ Թրամփի Սպիտակ տուն վերադարձից հետո միջազգային քաղաքականությունը կվերադառնա փոխադարձ հարգանքի տրամաբանությանը։
«Այժմ, երբ նախագահ Թրամփը վերադարձել է պաշտոնի, կարծում եմ, որ միջազգային քաղաքականությունը կվերադառնա փոխադարձ հարգանքի, ավելի մեծ ռացիոնալության և պրագմատիզմի, ավելի քիչ գաղափարականության և այլ երկրների ներքին գործերին միջամտության։ Շատ էր այն, ինչ անում էին դեմոկրատական վարչակազմը և Բրյուսելը՝ միջամտելով այլ երկրների ներքին գործերին և ճնշում գործադրելով։ Շատ լավ է, որ USAID-ի ֆինանսավորումը դադարեցվել է, քանի որ դա զգալիորեն նվազեցնում է այն կազմակերպությունների ֆինանսավորումը, որոնք խառնվում էին այլ պետությունների ներքին գործերին», – հայտարարել է Պիտեր Սիյարտոն։