Պիտեր Մադյար. Այսօր պետական լրատվամիջոցների հարթակներում քարոզչական հեռարձակումն ավարտվել է, նրանք ստել են բոլոր ալիքներով, հիմա ամեն ինչ ավարտվել է
Հունգարիայում պետական M1 հեռուստաալիքը ժամանակավորապես դադարեցրել է իր հեռարձակումները։
Հունգարական լրատվամիջոցների փոխանցմամբ, հեռարձակումների ընդհատումից հետո էկրանին հայտնվել է հաղորդագրություն, որում ասվում է, որ «հանրային շահերից ելնելով աշխատող լրատվամիջոցները չպետք է տարածեն կեղծ տեղեկատվություն, և հեռուստաալիքը ներողություն է խնդրում տարիներ շարունակ դա անելու համար»։
«Հանրային լրատվամիջոցները չպետք է ստեն: Մենք ներողություն ենք խնդրում այդքան տարիներ դա անելու համար: Հանրային լրատվամիջոցներն այժմ ենթարկվում են վերափոխման՝ անկախ և հուսալի մնալու համար: Լրատվական հեռարձակումը ժամանակավորապես դադարեցվել է», – ասվում է հեռուստաալիքի հայտարարության մեջ:
Հեռուստաալիքը հետագայում վերսկսեց հեռարձակումը, բայց նոր ձևաչափով՝ հեռարձակվում են միայն ֆիլմեր: Հեռուստաալիքի հաղորդմամբ, լրատվական ծրագրերը աստիճանաբար կվերականգնվեն նոր լրատվական ծառայության ստեղծումից հետո: Նմանատիպ հաղորդագրություն հայտնվեց Hirado.hu պետական լրատվական պորտալում, որը ժամանակավորապես չի գործում, ինչպես նաև Kossuth Radio պետական ռադիոյում, որը ամեն ուրբաթ հարցազրույց էր հեռարձակում նախկին վարչապետ Վիկտոր Օրբանի հետ:
Հունգարիայի վարչապետ Պետեր Մադյարը արձագանքեց դրան՝ միջադեպը անվանելով «պատմական»:
«Այսօր պետական լրատվամիջոցների հարթակներում քարոզչական հեռարձակումն ավարտվեց: Նրանք ստեցին գիշերը, ստեցին ցերեկը, ստեցին բոլոր ալիքներով: Հիմա ամեն ինչ ավարտվեց», – գրել է Մադյարը: