Փիթ Հեգսեթ. Խաղաղությունն ապահովելու համար անհրաժեշտ է պատրաստ լինել պատերազմի, իսկ դրա համար անհրաժեշտ են ավելի շատ զինվորներ, զինամթերք, անօդաչու թռչող սարքեր, ԱՄՆ-ն ուժեղ է, բայց պետք է ավելի ուժեղանա
Խաղաղությունն ապահովելու համար անհրաժեշտ է պատրաստ լինել պատերազմի,- ամերիկացի զինվորականների հավաքին ունեցած ելույթում ասել է ԱՄՆ ռազմական գերատեսչության ղեկավար Փիթ Հեգսեթը։
Նրա խոսքով՝ ԱՄՆ-ն ունի աշխարհի ամենահզոր զինված ուժերը, որոնց այսօր ոչ ոք չի կարող հաղթել։
«Պատերազմական գերատեսչության միակ առաքելությունն այսուհետ պատերազմին պատրաստվելն ու հաղթելն է։ Ոչ թե որովհետև մենք պատերազմ ենք ուզում, այլ որովհետև սիրում ենք խաղաղությունը։ Մենք սիրում ենք խաղաղությունը մեր հայրենակիցների համար։ Նրանք արժանի են խաղաղության և ակնկալում են, որ մենք այն կապահովենք։ Մեր առաջին առաջնահերթությունը բավականաչափ ուժեղ լինելն է՝ պատերազմը կանխելու համար։ Նախագահ Թրամփը անընդհատ խոսում է դրա մասին, և դա կոչվում է խաղաղություն ուժի միջոցով։ Պատմությունը մեզ սովորեցնում է, որ խաղաղության արժանի են միայն նրանք, ովքեր պատրաստ են պատերազմ մղել խաղաղությունը պաշտպանելու համար։ Ահա թե ինչու է պացիֆիզմն այդքան կործանարար և վտանգավոր։ Այն անտեսում է մարդկային բնույթը և մարդկային պատմությունը։ Դուք կամ պաշտպանում եք ձեր ժողովրդին և ձեր ինքնիշխանությունը, կամ դառնում եք ինչ-որ բանի կամ ինչ-որ մեկի ծառան», – ասել է Փիթ Հեգսեթը։
Ինչպես նշել է Հեգսեթը, Միացյալ Նահանգները պարտավորվել է ունենալ բանակ, որը կհաղթի ցանկացած պատերազմում։
«Մեր թշնամիները հիմարաբար կընտրեն մարտահրավեր նետել Միացյալ Նահանգներին։ Մենք կոչնչացնենք նրանց։ Ինչպես ասել է նախագահ Թրամփը, Միացյալ Նահանգներն ունի մոլորակի ամենահզոր և լավագույնս պատրաստված բանակը։ Դա ճիշտ է։ Վերջ, ոչ ոք չի կարող մեզ դիպչել։ Դա մեծ մասամբ ճիշտ է Դոնալդ Թրամփի կողմից իր առաջին ժամկետի ընթացքում կատարված ներդրումների շնորհիվ, և դրանք կշարունակվեն։ Դա նաև ճիշտ է Միացյալ Նահանգների անհավանական ռազմական առաջնորդների և զինվորների շնորհիվ», – ասել է Հեգսեթը։
Նա ասել է, որ հիմա այն ժամանակն է, երբ Ամերիկայի թշնամիները հզորանում են, և սպառնալիքները մեծանում են։
«Սա խաղեր խաղալու ժամանակը չէ։ Մենք պետք է պատրաստ լինենք։ Այս պահը պահանջում է ավելի շատ զինվորներ, ավելի շատ զինամթերք, ավելի շատ անօդաչու թռչող սարքեր, ավելի շատ հակաօդային պաշտպանության համակարգեր, ավելի շատ սուզանավեր և ավելի շատ ռմբակոծիչներ։ Այն պահանջում է ավելի շատ նորարարություն, ավելի շատ արհեստական բանականություն ամեն ինչում։ Ամերիկան ուժեղ է, բայց այն պետք է դառնա ավելի ուժեղ որքան հնարավոր է արագ», – ասել է ԱՄՆ Պատերազմի նախարարության ղեկավարը։
Հեգսեթը նաև ընդգծեց ԱՄՆ դաշնակիցների կողմից «բեռի բաշխման» անհրաժեշտությունը։
«Ամերիկան միայնակ չի կարող ամեն ինչ անել։ Ազատ աշխարհը կարիք ունի իսկապես ուժեղ դաշնակիցների, որոնք ունեն ռազմական առաջնորդներ և իրական ռազմական կարողություններ», – ասաց Հեգսեթը։
