Պետական անվտանգության ծառայությունը (ՊԱԾ) արձագանքում է Լևան Դավիթաշվիլիի հարցաքննությունից հետո լրատվամիջոցների հետ արված մեկնաբանությանը։
ՊԱԾ-ում հայտարարում են, որ Լևան Դավիթաշվիլիի տված հարցազրույցում առկա է երկու էական անճշտություն.
«ՊԱԾ-ը լքելուց հետո Լևան Դավիթաշվիլիի տված հարցազրույցում առկա է երկու էական անճշտություն.
Դավիթաշվիլին հակակոռուպցիոն գործակալությունում էր հարցաքննության՝ կոնկրետ քրեական գործով, և ոչ թե հանդիպման՝ հարցեր քննարկելու համար։
Հարցաքննության ժամանակ ռիսկերի հետ կապված հարցը վերաբերում էր Վրաստանի գազամատակարարմանը և կնքված պայմանագրով Վրաստանի համար պայմանների վատթարացմանը, ինչի վերաբերյալ ընթանում է հետաքննություն, և ոչ թե Եվրամիության գազամատակարարմանը. այս ուղղությամբ ռիսկերի մասին հարցաքննության մեջ ոչ մի բառ ասված չէ։ Եթե լինեն նմանատիպ այլ մեկնաբանություններ, կեղծ տեղեկություններ կամ շահարկումներ այս առնչությամբ, մենք պատրաստ ենք (հարցաքննված անձի համաձայնությամբ) հրապարակել հարցաքննության արձանագրությունը», – հայտարարում են ՊԱԾ-ում:
Վրաստանի էկոնոմիկայի և կայուն զարգացման նախկին նախարար Լևան Դավիթաշվիլին այսօր հարցաքննվել է Պետական անվտանգության ծառայությունում։ ՊԱԾ շենքը լքելուց հետո Դավիթաշվիլին լրագրողներին հայտնել էր.
«Մենք քննարկել ենք Վրաստանի գազամատակարարման հարցը։ Հավանաբար գիտեք, որ Վրաստանը մի քանի տարի է, ինչ շատ ակտիվ դեր է խաղում Եվրոպայի գազամատակարարման հարցում։ Մասնավորապես, մենք կարևոր ավանդ ունենք եվրոպական էներգետիկ անվտանգության հարցում։ Այս հարցում մենք համագործակցում ենք Ադրբեջանի Հանրապետության հետ։ Կարծում եմ՝ տվել եմ շատ մանրամասն ու սպառիչ տեղեկատվություն, և դրա համար, իհարկե, ժամանակ պահանջվեց։ Հարցերը շատ տրամաբանական էին։ Կային հարցեր, թե այս առումով մեր ակտիվ մասնակցությունը որքանով կարող է մատակարարման տեսանկյունից որոշակի ռիսկեր ստեղծել կամ չստեղծել։ Հետևաբար, մեզ համար շատ տրամաբանական էր, որ այս բոլոր հարցերը սպառիչ կերպով քննարկեինք։ Սա այն հիմնական հարցն է, որը մենք քննարկել ենք։ Նաև քննարկել ենք, թե ապագայում ինչպես տեղի ունենա Վրաստանի կայուն գազամատակարարումը։ Մենք ունենք պայմանագրեր, որոնք ունեն որոշակի ժամկետներ։ Որոշ պայմանագրեր մեզ համար երկարաժամկետ երաշխավորված են, որոշ պայմանագրերի երկարաձգում և վերանայում է անհրաժեշտ, և այս հարցերը ևս քննարկել ենք»։
