Պաշտպանության նախարարություն. Տարբեր երկրների ռազմական կցորդները դրական են գնահատում պաշտպանության նոր օրենսգիրքը
Վրաստանում հավատարմագրված դիվանագիտական կորպուսի ներկայացուցիչները դրական են գնահատում պաշտպանության նախարարության մշակած պաշտպանության նոր օրենսգիրքը, որը ևս մեկ կարևոր քայլ է վրացական բանակի հզորացման և նրա ինստիտուցիոնալ զարգացման համար, հայտնում է ՊՆ-ն։
Գերատեսչության տեղեկություններով՝ տեղի է ունեցել խորհրդակցություն, որտեղ ուշադրություն է դարձվել երկրի համար պաշտպանական օրենսգրքի կարևորությանը և նշվել է, որ բարեփոխումները մշակվել են՝ աշխարհի առաջատար երկրների լավագույն փորձը, Վրաստանի անվտանգության և պաշտպանության նպատակները հաշվի առնելով:
«Հարկ է նշել, որ պաշտպանության նոր օրենսգիրքը էապես փոխում է և պարտադիր զինվորական ծառայությունը լիովին հարմարեցնում պաշտպանական նպատակներին և ներմուծում զինծառայողների սոցիալական պաշտպանության կարևորագույն երաշխիքները։ Նոր օրենսգիրքը ամուր հիմք է ստեղծում ռեզերվի համար, ինչը կարևոր է երկրի պաշտպանունակության համար։
Դիվանագիտական կորպուսի, ՆԱՏՕ-ի հիմնական խմբի և միջազգային կազմակերպությունների ներկայացուցիչները նշել են, որ, հաշվի առնելով առկա սպառնալիքները, պաշտպանության օրենսգրքի մշակումը կարևոր քայլ է երկրի պաշտպանունակության ամրապնդման գործում։
2022 թվականի վերջին ՊՆ-ն նախաձեռնել է Պաշտպանության օրենսգրքի նախագիծը, որը նախատեսվում է քննարկել և ընդունել խորհրդարանի գարնանային նստաշրջանում»,- նշվում է ՊՆ հաղորդագրության մեջ։