Եվրոպան խոցելի է, երբ խոսքը վերաբերում է էներգառեսուրսների մատակարարմանը, Վրաստանի և Եվրամիության միջև էլեկտրական մալուխի նախագիծը կնվազեցնի տարածաշրջանի խոցելիությունը, Բրյուսելում լրագրողներին ասել է Եվրոպական միության հարևանության և ընդլայնման հարցերով հանձնակատար Օլիվեր Վարհեյը, մեկնաբանելով Վրաստանի և Եվրամիության միջև էլեկտրահաղորդման մալուխի նախագծի ֆինանսավորումը։

Վարհեյի խոսքով, էլեկտրահաղորդման մալուխի նախագիծը կարևոր է ոչ միայն արևելյան գործընկերների, այլև հարավային հարևանության համար։

«Նախ ուզում եմ նշել, որ ճգնաժամերը նոր հնարավորություններ են ստեղծում, և մենք ցանկանում ենք օգտագործել այդ նոր հնարավորությունները։ Հոսանքի մալուխի նախագիծը շատ կարևոր կլինի բոլորի համար։ Այս ծրագիրը կարևոր է ոչ միայն արևելյան գործընկերների, այլև հարավային մեր հարևանության համար։ Եվրոպան խոցելի է, երբ խոսքը վերաբերում է էներգառեսուրսների մատակարարմանը, և այս պահին հարավկովկասյան տարածաշրջանը կարող է կանաչ էներգիա ապահովել Եվրոպային։ Սա կնվազեցնի մեր խոցելիությունը: Այս նախագծով մենք նվազեցնում ենք մարզի խոցելիությունը, քանի որ միացնում ենք հիմնական ենթակառուցվածքը։ Մենք կարող ենք օգնել միմյանց: Կապակցելը 17 միլիարդանոց տնտեսական և ներդրումային ծրագրի կարևոր բաղադրիչն է: Մենք ցանկանում ենք մեծացնել Սև ծովի կապը ոչ միայն էներգետիկ ռեսուրսների հետ կապված, այլ նաև նկատի ունենք ինտերնետն ու տրանսպորտը։ Մեզ անհրաժեշտ են նոր ներդրումներ, նոր երթուղիներ, և դա կնպաստի Հարավային Կովկասի, Արևելյան գործընկերության նախաձեռնության մասնակից երկրների և Եվրամիության կայունությանը»,- ասել է Վարհեյը։