Նորընտիր Հռոմի պապը իր առաջին ելույթում կոչ է արել Ուկրաինայում «արդար և երկարատև խաղաղության»

Ինչպես հաղորդում է Associated Press-ը, իր առաջին ելույթում նորընտիր Հռոմի պապ Լեո XIV-ը կոչ է արել Ուկրաինայում «արդար և երկարատև խաղաղության» և Գազայի հատվածում անհապաղ հրադադարի:

Լեո XIV-ը, Սուրբ Պետրոսի հրապարակում հավաքված ժողովրդին ուղղված իր ուղերձում, հայտարարեց, որ կրկին կդիմի աշխարհի մեծ ազգերին կոչով՝ «Թող այլևս երբեք պատերազմ չլինի»։

«Ես սրտումս կրում եմ սիրելի ուկրաինացի ժողովրդի տառապանքը», – ասաց Հռոմի պապը, որը նույն ելույթում կոչ արեց ազատ արձակել ռազմագերիներին և ուկրաինացի երեխաներին վերադարձնել իրենց ընտանիքներ։

Լեո XIV-ը իր ելույթում խոսեց նաև Գազայի հատվածում ընթացող պատերազմի մասին։ Իր ելույթում պապը կոչ արեց անհապաղ դադարեցնել ռազմական գործողությունները, վերականգնել խաղաղ բնակիչներին տրամադրվող մարդասիրական օգնությունը և ազատ արձակել բոլոր պատանդներին։

Բացի այդ, Հռոմի պապը ողջունեց Հնդկաստանի և Պակիստանի միջև կնքված հրադադարի համաձայնագիրը։

Associated Press-ի փոխանցմամբ՝ հրապարակում հավաքվել էր մոտ 100,000 մարդ՝ լսելու պապի առաջին ուղերձը։

Նոր Հռոմի պապը ընտրվեց կոնկլավի կողմից մայիսի 8-ին։ 267-րդ պապը դարձավ ամերիկացի Ռոբերտ Պրևոստը։ Նա դարձավ ԱՄՆ առաջին ներկայացուցիչը, որը գլխավորեց Հռոմի կաթոլիկ եկեղեցին։