Վրաստանի խորհրդարանի արտաքին հարաբերությունների հանձնաժողովի նախագահ Նիկոլոզ Սամխարաձեն Սլովենիայի Հանրապետություն կատարած պաշտոնական այցի շրջանակում մասնակցել է սլովենական առաջատար վերլուծական կազմակերպության՝ Եվրոպական հեռանկարների կենտրոնի կողմից կազմակերպված կլոր սեղանին, որը նվիրված էր Վրաստանի դերին Սև ծովի և հարավկովկասյան տարածաշրջանի անվտանգությունը։

Խորհրդարանի մամուլի ծառայությունից հայտնում են, որ Նիկոլոզ Սամխարաձեն իր ելույթի ընթացքում անդրադարձել է սևծովյան տարածաշրջանի մարտահրավերներին, Ռուսաստանից եկող սպառնալիքներին և Վրաստանի՝ որպես տարածաշրջանում խաղաղությանն ու կայունությանը նպաստող երկրի կարևորությանը, ինչպես նաև ՆԱՏՕ-ի ընդլայնման հարցին։

«Ուկրաինայում շարունակվող ռուսական ագրեսիան փոխեց գոյություն ունեցող անվտանգության միջավայրը, ինչը մեծացրեց սեւծովյան եւ հարավկովկասյան տարածաշրջանների կարեւորությունը։ Այս գործընթացում Վրաստանը յուրահատուկ դեր ունի մի կողմից՝ օգնելու Եվրոպային նվազեցնել կախվածությունը ռուսական էներգառեսուրսներից և գտնել այլընտրանքային ուղիներ, իսկ մյուս կողմից՝ կատարել հարավում խաղաղությանն ու կայունությանը նպաստող երկրի գործառույթը։ Սա, իհարկե, ենթադրում է Վրաստանի ներգրավվածությունն ու միջնորդությունը Հայաստանի և Ադրբեջանի միջև լարված հարաբերությունների կարգավորման գործում։ Նաև Վրաստանի անդամակցությամբ կարևոր է ՆԱՏՕ-ի ընդլայնումը, ինչը կամրապնդի տարածաշրջանում կայունության և անվտանգության երաշխիքները»,- ասել է Նիկոլոզ Սամխարաձեն։

Քննարկմանը մասնակցել են սլովենացի հետազոտողներ, Սլովենիայում հավատարմագրված դեսպաններ և դիվանագիտական ​​կորպուսի ներկայացուցիչներ։