Ես կոչ եմ անում Բելառուսի իշխանություններին հարգել Վրաստանի ինքնիշխանությունն ու տարածքային ամբողջականությունը, դադարեցնել այնպիսի գործողությունները, որոնք ուղղակիորեն հակասում են միջազգային իրավունքի հիմնարար սկզբունքներին, ասել է Վրաստանի խորհրդարանի արտաքին հարաբերությունների կոմիտեի նախագահ և ԵԱՀԿ Խորհրդարանական վեհաժողովում մշտական ​​պատվիրակության ղեկավար Նիկոլոզ Սամխարաձեն։

Ելույթ ունենալով ԵԱՀԿ Խորհրդարանական վեհաժողովի ձմեռային նստաշրջանի շրջանակում կայացած երեք կոմիտեների համատեղ նիստում՝ Նիկոլոզ Սամխարաձեն դատապարտել է այս շաբաթ Բելառուսի պաշտոնյաների և Աբխազիայի դե ֆակտո իշխանության ներկայացուցիչների հանդիպումը։

Բելառուսի նախագահ Ալեքսանդր Լուկաշենկոն Մինսկում հանդիպել է օկուպացված Աբխազիայի «առաջնորդ» Ասլան Բժանիայի հետ, որտեղ ասել է. «Ինչո՞ւ է Վրաստանի ղեկավարությունն այդքան կոշտ արձագանքում աբխազների հետ հանդիպումներին։ Միգուցե այս հանդիպումները ծառայում են աբխազների և վրացիների բարեկամությանը»։

Տեղեկությունը տարածում է Վրաստանի խորհրդարանի մամուլի ծառայությունը։