Նիկոլ Փաշինյանը Հայաստան-Ադրբեջան սահմանին զարգացող իրադարձությունները գնահատում է որպես Բաքվի կողմից նախապես ծրագրված գործողություն:

«Ադրբեջանի իշխանությունների վերջին ագրեսիվ հայտարարությունները, Թուրքիայի հետ լայնածավալ համատեղ զորավարժությունները, ինչպես նաև ԵԱՀԿ-ի և գործող նախագահի անձնական ներկայացուցչի կողմից դիտարկության հայցերի մերժումը հստակ ցույց են տալիս, որ այս ագրեսիան կանխամտածված էր և ներառում է լայնածավալ սադրանքներ տարածաշրջանում»:

Հայաստանի և Ադրբեջանի սահմանին իրավիճակը ծայրաստիճան լարված է: Կողմերը հայտնում են ռազմական բախումների և զոհերի մասին:

Ադրբեջանական լրատվամիջոցների փոխանցմամբ, այսօր առավոտյան Հայաստանի կողմից իրականացվել է լայնածավալ հարձակում: Արդյունքում կան զոհեր, այդ թվում  քաղաքացիական անձանց շրջանում: Ադրբեջանի պաշտպանության նախարարության հաղորդմամբ, Ադրբեջանի բանակն անցել է հակահարձակման: Հայաստանում ասում են, որ Ադրբեջանը հարձակում է սկսել Լեռնային Ղարաբաղի ուղղությամբ: Հայաստանի պաշտպանության նախարարությունը հայտնում է, որ հայ զինվորականները խոցել են ադրբեջանական երկու ուղղաթիռ և անօդաչու թռչող սարք: Նրանց խոսքով, կրակոցների ձայնը լսվում էր նաև Ստեփանակերտում: Դրա հետ մեկտեղ, Հայաստանի կառավարությունը երկրում հայտարարել է արտակարգ դրություն: