Ռուսաստանի նախագահ Վլադիմիր Պուտինը հանդիպել է Հայաստանի վարչապետ Նիկոլ Փաշինյանի հետ։

Փաշինյանը մասնակցել է Մոսկվայում ընթացող Գլոբալ ատոմային էներգիայի ֆորումին, որի շրջանակներում նա հանդիպել է Ռուսաստանի նախագահի հետ։

Պուտինը և Փաշինյանը քննարկել են հայկական ատոմակայանի գործունեությունը, ինչպես նաև երկկողմ հարաբերությունների տարբեր ասպեկտներ։

Հանդիպման ընթացքում Պուտինը նշել է, որ Ռուսաստանի և Հայաստանի միջև հարաբերությունները «կայուն և լավ են զարգանում»։

«Առևտրաշրջանառությունը կազմում է գրեթե 11 միլիարդ դոլար, որը կազմում է հանրապետության արտաքին առևտրի 34%-ը։ Մեր վիճակագրության համաձայն՝ Ռուսաստանի հետ Հայաստանի առևտուրը կազմում է 11,7 միլիարդ դոլար, ինչը ռեկորդային բարձր ցուցանիշ է։ Հարաբերությունները զարգանում են նաև մնացած բոլոր ոլորտներում», – ասել է Պուտինը՝ նշելով, որ Հայաստանի հետ միշտ շատ բան կա քննարկելու։

Իր հերթին Փաշինյանը շնորհակալություն է հայտնել ֆորումին մասնակցելու հրավերի համար և նշել, որ Հայաստանի և Ռուսաստանի միջև «հարաբերությունները կայուն զարգանում են»։

«Ճիշտ է, որ այս տարի կա փոքր անկում, և դա պայմանավորված է որոշակի համաշխարհային գործընթացներով, բայց ես կարծում եմ, որ այս հարցի շուրջ անհրաժեշտ է համապատասխան աշխատանք, որպեսզի մեր երկկողմ առևտուրը շարունակի աճել այն տեմպերով, որոնք մենք նախատեսել էինք 2023-2024 թվականներին», – նշեց Փաշինյանը։