ՆԳՆ – Ռուսաստանի Դաշնության քաղաքացի Դենիս Կուլանինին յոթօրյա ժամկետ է տրվել Վրաստանի տարածքը կամավոր լքելու համար
Վրաստանի Ներքին գործերի նախարարությունը հայտարարություն է տարածել։ Ինչպես նշված է հայտարարության մեջ, Վրաստանի Ներքին գործերի նախարարության միգրացիայի դեպարտամենտը Ռուսաստանի Դաշնության քաղաքացի Դենիս Կուլանինի նկատմամբ իրականացնում էր արտաքսման վարույթ՝ հիմնվելով «Օտարերկրացիների և քաղաքացիություն չունեցող անձանց իրավական կարգավիճակի մասին» օրենքի 51-րդ հոդվածի 1-ին կետի «գ» ենթակետի վրա։
ՆԳՆ-ի տվյալներով՝ վերոնշյալ օրենքի 52-րդ հոդվածի 2-րդ կետի համաձայն, միգրացիայի դեպարտամենտը միջնորդություն է ներկայացրել Թբիլիսիի քաղաքային դատարան՝ Դենիս Կուլանինին Վրաստանից արտաքսելու վերաբերյալ։
«Այս տարվա սեպտեմբերի 4-ին Թբիլիսիի քաղաքային դատարանի վարչական գործերի կոլեգիան որոշում կայացրեց Դենիս Կուլանինին Վրաստանից արտաքսելու մասին: Վերոնշյալ օրենքի 54-րդ հոդվածի 1-ին կետի համաձայն՝ անձին տրվել է յոթօրյա ժամկետ՝ Վրաստանի տարածքը կամավոր լքելու իր ընտրած ուղղությամբ: Եթե անձը նշված ժամկետում կամավոր չլքի երկիրը, օրենքի 57-րդ հոդվածի 1-ին կետի համաձայն՝ արտաքսման որոշումը կիրականացվի հարկադիր կարգով: Դատարանի որոշմամբ անձին արգելվել է մուտք գործել երկիր հինգ տարի ժամկետով», – ասվում է ՆԳՆ հայտարարության մեջ:
Հիշեցնենք, որ Դենիս Կուլանինը ձերբակալվել էր անցյալ տարվա բողոքի ակցիայի ժամանակ ոստիկանական մեքենան վնասելու համար և այն անձանց թվում էր, որոնց ներում էր շնորհվել Վրաստանի նախագահ Միխեիլ Ղավելաշվիլիի կողմից օգոստոսի 28-ին՝ Սուրբ Աստվածածնի Վերափոխման տոնի կապակցությամբ: