Ներքին գործերի նախարարության Թբիլիսիի ոստիկանության վարչության Վակե-Սաբուրթալոյի գլխավոր բաժնի աշխատակիցները Թբիլիսիի քաղաքային դատարանում տեղի ունեցած դեպքի կապակցությամբ քննչական գործընթաց են սկսել Քրեական օրենսգրքի 353 հոդվածով, որը նախատեսում է հարձակում պետական պաշտոնյայի նկատմամբ՝ ծառայողական պարտականությունների կատարման ընթացքում։

ՆԳՆ-ի տեղեկությամբ՝ իրականացված քննությամբ պարզվել է, որ 2025 թվականի հունիսի 9-ին, Թբիլիսիի քաղաքային դատարանում ընդդիմադիր կուսակցությունների անդամների և քաղաքացիական ակտիվիստների դատական նիստին փորձել է մուտք գործել 1982 թվականին ծնված Ն.Դ.։

Նախարարության տվյալներով՝ մանդատուրայի ծառայության աշխատակիցները Ն.Դ.-ին բացատրել են, որ դատական նիստին մասնակցել չի կարող, քանի որ այն արդեն սկսված էր և դահլիճում ազատ տեղ չկար։

«Ն.Դ.-ն չի ենթարկվել մանդատուրայի աշխատակիցներին և նրանցից մեկին ֆիզիկական վիրավորանք է հասցրել։ Դեպքից հետո մանդատուրայի ծառայողները Ն.Դ.-ին հեռացրել են քաղաքային դատարանի շենքից։ Գործի շրջանակում շարունակվում են համապատասխան դատավարական և քննչական գործողությունները», – ասված է ՆԳՆ-ի տարածած հաղորդագրությունում։