Նեպալում ջրհեղեղներից և սողանքներից մահացածների թիվը հասել է 95-ի
Ռոյթերսի հաղորդմամբ՝ Նեպալում ջրհեղեղներից և սողանքներից մահացածների թիվը հասել է 95-ի։
Նեպալ-Չինաստան սահմանի երկայնքով տեղի ունեցած զանգվածային ջրհեղեղները վնասել են Նեպալում տներ, ճանապարհներ, կամուրջներ և էներգետիկ ենթակառուցվածքներ։
Նեպալի զբոսաշրջության նախարարության տվյալներով՝ անհետ կորած է համարվում 341 օտարերկրյա ճանապարհորդ, այդ թվում՝ ավելի քան 100 Հնդկաստանի քաղաքացի, երեք ԱՄՆ քաղաքացի և 12 Մեծ Բրիտանիայի քաղաքացի։ Անհետ կորածների թվում են նաև տեղի բնակիչներ։
Տեղական լրատվամիջոցների տվյալներով՝ մոտ 65 մարդ տեղափոխվել է հիվանդանոցներ։
Տարածաշրջանում 4.4 մագնիտուդով երկրաշարժ է գրանցվել միջադեպից մոտ յոթ րոպե առաջ։
Չինական կողմից սողանքը վնասել է Ջիրոնգի սահմանային նավահանգիստը։ Չինաստանի պետական լրատվական գործակալությունը հայտնել է, որ վնասվել են ճանապարհները, կապի և էլեկտրահաղորդման գծերը։ Փրկարարական գործողությանը մասնակցում է ավելի քան 600 փրկարար և հատուկ տեխնիկա։
Չինաստանի նախագահ Սի Ցզինպինը կոչ է արել «բոլոր ջանքերը» գործադրել անհետ կորածներին գտնելու, ինչպես նաև ուժեղացնել մոնիթորինգի և վաղ նախազգուշացման համակարգերը՝ աղետի կրկնությունը կանխելու համար։