Մոդուլային ժամանակավոր դպրոցական ենթակառուցվածքներ են նախատեսվում տեղադրել ամբողջ Վրաստանում
Ենթակառուցվածքների նախարարության մունիցիպալ զարգացման հիմնադրամը նախատեսում է ամբողջ Վրաստանում կազմակերպել մոդուլային ժամանակավոր դպրոցական ենթակառուցվածքներ: Հիմնադրամն արդեն հայտարարել է մոդուլների գնման մրցույթ:
Ենթակառուցվածքների նախարարության տվյալներով՝ մոդուլային ժամանակավոր դպրոցական ենթակառուցվածքներ գնելու որոշումը համատեղ կայացվել է ենթակառուցվածքների և կրթության նախարարությունների կողմից:
Նախաձեռնության նպատակն է ստեղծել անվտանգ, լիովին հագեցած և համապատասխան ժամանակավոր տարածքներ աշակերտների համար նոր դպրոցների կառուցման և առկա դպրոցների վերականգնման ընթացքում, որպեսզի ուսումնական գործընթացը չխաթարվի շինարարական աշխատանքների պատճառով և աշակերտներին այլ դպրոցներ տեղափոխելու անհրաժեշտությունը նվազագույնի հասցվի:
Մոդուլային դպրոցները դպրոցական համալիրներ են, որոնք հավաքված են նախապես պատրաստված, լիովին հագեցած և փոխադրելի ուսումնական տարածքներից, որոնք կարող են տեղադրվել տեղում կարճ ժամանակում: Դրանք նախատեսվում է օգտագործել այն դպրոցներում, որտեղ աշակերտների համար ժամանակավոր ուսումնական տարածքներ անհրաժեշտ կլինի կազմակերպել նոր շենքի կառուցման կամ առկա շենքի վերանորոգման ընթացքում:
Մոդուլային դպրոցները թույլ կտան աշակերտներին ժամանակավորապես շարունակել իրենց ուսումը անմիջապես դպրոցի տարածքում կամ մոտակայքում՝ անվտանգ և լիովին հագեցած միջավայրում: Սա կնվազեցնի աշակերտներին այլ դպրոցներ տեղափոխելու և ամենօրյա տրանսպորտի անհրաժեշտությունը և կնպաստի կրթական գործընթացի շարունակականությանը:
Նախագիծը նախատեսում է դպրոցական մոդուլների ձեռքբերում և դրանց տեղադրում տեղում՝ անհրաժեշտության դեպքում։ Անհրաժեշտության դեպքում համապատասխան տարածքներում կկազմակերպվեն նաև արտաքին ինժեներական ենթակառուցվածքներ։
Նախագիծը նախատեսում է մի քանի տեսակի մոդուլների ձեռքբերում, ընդհանուր առմամբ մինչև 750 մոդուլ՝ 600 դասարանային մոդուլ, 100 վարչական մոդուլ և 50 սանիտարական մոդուլ։
Յուրաքանչյուր դասարանային մոդուլ նախատեսված կլինի 10-12 աշակերտի և մեկ ուսուցչի համար։ Վարչական մոդուլներում կտեղակայվեն դպրոցի վարչակազմի, դպրոցի տնօրենի և բժշկի աշխատանքային տարածքները, ինչպես նաև օժանդակ սենյակները և համապատասխան սանիտարական հարմարությունները։
Մոդուլները կարող են միացվել միմյանց՝ ստեղծելով համապատասխան չափի և դասավորության մեկ դպրոցական տարածք։ Անհրաժեշտության դեպքում դրանք կարող են տեղադրվել տարբեր կոնֆիգուրացիաներով և երկու հարկերում։
Բոլոր մոդուլները կհագեցվեն էլեկտրամատակարարմամբ, լուսավորությամբ, ջեռուցման և սառեցման, հրդեհային անվտանգության, տեսահսկման և տեղեկատվական-հաղորդակցական համակարգերով և լիովին կհարմարեցվեն հաշմանդամություն ունեցող անձանց համար։
Մոդուլային ժամանակավոր ենթակառուցվածքը նախատեսված կլինի բազմակի օգտագործման համար. որոշակի դպրոցի կարիքը վերացնելուց հետո մոդուլները կարող են ապամոնտաժվել, տեղափոխվել մեկ այլ տարածք և վերադասավորվել։
Նմանատիպ մոդուլային ժամանակավոր ուսումնական տարածքների օգտագործումը ապացուցված պրակտիկա է եվրոպական երկրներում, հատկապես դպրոցների շինարարության և վերանորոգման ընթացքում, երբ անհրաժեշտություն կա արագ կազմակերպել ժամանակավոր ուսումնական տարածքներ։
Այս մասին տեղեկատվություն է’ տարածում Ենթակառուցվածքների նախարարությունը։