Վրաստանի նախագահ Միխեիլ Ղավելաշվիլին հանդիպել է Վրաստանում Չինաստանի Ժողովրդական Հանրապետության արտակարգ և լիազոր դեսպան Չժոու Ցյանի հետ։

Վրաստանի նախագահի աշխատակազմի հաղորդմամբ, հանդիպման ժամանակ ընդգծվել է Վրաստանի և Չինաստանի միջև ռազմավարական գործընկերության և երկկողմ հարաբերությունների զարգացման դրական դինամիկան, ինչպես նաև առևտրատնտեսական, զբոսաշրջության, մշակույթի, սպորտի և կրթության ոլորտներում արդյունավետ համագործակցությունը։

Հանդիպման ժամանակ Վրաստանի նախագահը ընդգծել է «Մեկ գոտի, մեկ ճանապարհ» նախաձեռնության շրջանակներում համագործակցության և Միջին միջանցքի զարգացման կարևորությունը։ Բացի այդ, նշվել է, որ Վրաստանը պատրաստ է իր ներդրումն ունենալ Միջին միջանցքի զարգացման, դրա անվտանգության և արդյունավետ գործունեության մեջ։

Հանդիպման ժամանակ կողմերը ևս մեկ անգամ հաստատել են իրենց անվերապահ աջակցությունը երկու երկրների ինքնիշխանությանը և տարածքային ամբողջականությանը։

Հանդիպումը տեղի է ունեցել Վրաստանի նախագահական պալատում։