Մեր խնդիրն է զարգացնել կառուցողական, փոխադարձ հարգանքի և փոխշահավետ հարաբերություններ այնպիսի հզոր տնտեսությունների հետ, ինչպիսիք են ԱՄՆ-ն, Չինաստանը, Եվրամիությունը և այլն։ Մենք բաց ենք ցանկացած երկխոսության և համագործակցության համար, բայց միևնույն ժամանակ պահանջում ենք հարգանք, արդար և արժանապատիվ վերաբերմունք։ Այն, ինչ վրաց ժողովուրդը չի հանդուրժի, վերջնագրերն են, շանտաժը և սպառնալիքները, – այս մասին Վրաստանի նախագահ Միխեիլ Ղավելաշվիլին հայտարարել է ՄԱԿ-ի Գլխավոր ասամբլեայի 80-րդ նստաշրջանում իր ելույթում։

Միխեիլ Ղավելաշվիլիի խոսքով՝ հենց կառավարության պրագմատիկ և ռացիոնալ քաղաքականությունն է, որ պահպանել է խաղաղությունն ու տնտեսական աճը երկրում։

«Վրաստանը հավատարիմ է ՄԱԿ-ի հռչակագրի հիմնարար սկզբունքներին և արժեքներին և միջազգային հանրության արժանի և պատասխանատու անդամ է, ինչը հաստատվում է նաև Վրաստանի ներկայիս կառավարության կողմից մարդու իրավունքների պաշտպանության որակի բարելավման ուղղությամբ գործադրված մեծ ջանքերով։ Կառավարության պրագմատիկ և ռացիոնալ քաղաքականության շնորհիվ է, որ մենք պահպանել ենք խաղաղությունը և տնտեսական աճը, դրանով իսկ զգալիորեն բարելավելով մեր քաղաքացիների կյանքի որակը։ Վերջին տարիներին, չնայած բազմաթիվ մարտահրավերներին, Վրաստանը ցուցադրել է արտաքին ցնցումների նկատմամբ տպավորիչ դիմադրողականություն։ Վրաստանի զարգացման դրական դինամիկան արտացոլվում և հաստատվում է միջազգային վարկանիշներով և աշխարհի ամենահեղինակավոր կազմակերպությունների պարամետրերով», – ասել է Վրաստանի նախագահը ՄԱԿ-ի Գլխավոր ասամբլեայի 80-րդ նստաշրջանում իր ելույթում։