Անօրինական միգրացիայի դեմ պայքարի շրջանակներում Ներքին գործերի նախարարության միգրացիայի վարչությունը անցկացրել է ներգաղթի վերահսկողության հատուկ գործողություն։ Այս մասին հայտնում է Ներքին գործերի նախարարությունը։

«Ստացված տեղեկատվության հիման վրա, գործողության շրջանակներում, վարչության աշխատակիցների կողմից ստուգվել են կոնկրետ վայրեր, որոնց նպատակն էր Վրաստանում առանց օրինական հիմքի գտնվող օտարերկրյա քաղաքացիների նույնականացումը։

Բարդ գործողության արդյունքում ձերբակալվել է 20 օտարերկրյա քաղաքացի։ Նրանց թվում են Հնդկաստանի, Պակիստանի, Բանգլադեշի, Նեպալի, Եգիպտոսի, Հորդանանի, Ֆիլիպինների և Թուրքմենստանի քաղաքացիներ։ Պարզվել է, որ նրանք երկրում են գտնվել «Օտարերկրացիների և քաղաքացիություն չունեցող անձանց իրավական կարգավիճակի մասին» Վրաստանի օրենքով սահմանված պահանջների խախտմամբ։

Անձինք ներկայումս պահվում են Միգրացիայի վարչության ժամանակավոր տեղավորման կենտրոնում։ Ձեռնարկվում են համապատասխան ընթացակարգեր նրանց երկրից արտաքսելու համար։

Միգրացիայի վարչությունը պարբերաբար իրականացնում է հատուկ ներգաղթային վերահսկողություն՝ «Օտարերկրացիների և քաղաքացիություն չունեցող անձանց իրավական կարգավիճակի մասին» Վրաստանի օրենքի արդյունավետ կիրառումն ապահովելու համար», – ասվում է ՆԳՆ տեղեկատվության մեջ։