Անօրինական միգրացիայի դեմ պայքարի շրջանակներում Ներքին գործերի նախարարության միգրացիայի դեպարտամենտի աշխատակիցները Թբիլիսիում, Զուգդիդիում, Քոբուլեթիում և Բաթումիում իրականացրել են հատուկ ներգաղթային վերահսկողության միջոցառումներ։ Համալիր գործողությունների արդյունքում ձերբակալվել է օտարերկրյա 53 քաղաքացի, այդ թվում՝ Քենիայի, Ուգանդայի, Հնդկաստանի, Թուրքմենստանի, Ֆիլիպինների, Կուբայի, Հորդանանի, Ռուսաստանի, Թուրքիայի, Գանայի, Զիմբաբվեի և Եթովպիայի քաղաքացիներ։

Իրականացված միջոցառումների շրջանակներում դեպարտամենտի աշխատակիցների կողմից ստուգվել են կոնկրետ վայրեր և տարբեր նշանակության օբյեկտներ, ինչը նպատակ ուներ բացահայտել Վրաստանում առանց օրինական հիմքերի գտնվող օտարերկրյա քաղաքացիներին։

Պարզվել է, որ ձերբակալված անձինք երկրում գտնվել են «Օտարերկրացիների և քաղաքացիություն չունեցող անձանց իրավական կարգավիճակի մասին» Վրաստանի օրենքով սահմանված պահանջների խախտմամբ։

Ներկայումս ձերբակալվածները տեղավորված են միգրացիայի դեպարտամենտի ժամանակավոր տեղավորման կենտրոնում։ Ընթանում են համապատասխան ընթացակարգեր նրանց երկրից արտաքսելու նպատակով։