Մայա Սանդուն ասում է, որ Ռուսաստանի կողմից Ուկրաինա-Մոլդովա սահմանին գտնվող միջազգային սահմանային անցակետի վրա հարձակումից հետո պաշտոնական Քիշնևը ստիպված է եղել ժամանակավորապես փակել իր օդային տարածքը
Մոլդովայի նախագահ Մայա Սանդուն արձագանքել է մոլդովա-ուկրաինական սահմանային «Ստարոկոզաչե» անցակետի վրա հարձակմանը։ Նրա խոսքով՝ սեպտեմբերի 8-ի գիշերը պաշտոնական Քիշնևը ստիպված է եղել փակել իր օդային տարածքը։
«Երեկ ռուսական անօդաչու թռչող սարքը մեզ ստիպեց ժամանակավորապես փակել մեր օդային տարածքը։ Այսօր Ռուսաստանը հարվածներ է հասցնում այն կետերին, որտեղից մարդիկ անցնում են Մոլդովա», – գրում է Մայա Սանդուն։
Մոլդովայի նախագահը հայտարարել է, որ նման միջադեպերը կանխելու համար Ուկրաինայի երկինքը պետք է պաշտպանված լինի, և որ պաշտոնական Կիևին անհրաժեշտ է օդային պաշտպանություն։
«Ռուսական առաջնագիծը շարժվում է դեպի արևմուտք, ուստի Ուկրաինայի համար օդային պաշտպանությունը հրատապ է», – ասել է Մոլդովայի նախագահը։
Ձեր տեղեկության համար, Ռուսաստանը հարձակվել է Օդեսայի մարզում, Մոլդովայի սահմանի մոտ գտնվող միջազգային սահմանային «Ստարոկոզաչե» անցակետի վրա։ Միջադեպի հետևանքով զոհվել է առնվազն երկու մարդ։