ԱՄՆ պետքարտուղար Մարկո Ռուբիոն հայտարարել է, որ առաջիկա շաբաթում հանդիպելու է Դանիայի և Գրենլանդիայի ղեկավարների հետ։

Լրագրողների հարցին, թե արդյոք ԱՄՆ-ն պատրաստվում է զբաղեցնել Գրենլանդիան, Ռուբիոն պատասխանել է, որ այդ հարցի վերաբերյալ հայտարարություն կանի Դանիայի և Գրենլանդիայի առաջնորդների հետ հանդիպումից հետո։

Նա նաև անդրադարձել է Վենեսուելային՝ նշելով, որ Միացյալ Նահանգներն ունի «հսկայական վերահսկողություն» Վենեսուելայի կառավարության վրա։

«Գլխավորը այն է, որ այս պահին ընթացքի մեջ է մի գործընթաց, որի շրջանակում մենք մեծ վերահսկողություն և լծակներ ունենք ժամանակավոր կառավարության ներկայացուցիչների գործողությունների նկատմամբ։ Սակայն ակնհայտ է, որ սա անցումային փուլ է», — ասել է Ռուբիոն։

Նրա խոսքով, երկարաժամկետ հեռանկարում հենց Վենեսուելայի ժողովուրդը պետք է որոշի իր երկրի ճակատագիրը։

«Ի վերջո, Վենեսուելայի ժողովրդի վրա է կախված՝ փոխելու իրենց երկիրը։ Ես հասկանում եմ, որ այն հասարակության և ժամանակաշրջանի պայմաններում, որտեղ հիմա ապրում ենք, բոլորը ցանկանում են անհապաղ արդյունքներ։ Նրանք ուզում են, որ ամեն ինչ կատարվի մեկ գիշերվա ընթացքում։ Բայց այդպես չի աշխատում։ Նոր համաձայնագրով մենք արդեն որոշակի առաջընթաց ենք նկատում», — հայտարարել է Ռուբիոն։