ԱՄՆ պետքարտուղար Մարկո Ռուբիոն հայտարարել է, որ ԱՄՆ-ն չի պատրաստվում պատժել եվրոպացի դաշնակիցներին Իրանի դեմ պատերազմում նրանց աջակցության բացակայության համար: Ռուբիոն լրագրողների հետ զրույցում խոսել է ՆԱՏՕ-ի արտաքին գործերի նախարարների Շվեդիայում կայանալիք հանդիպումից առաջ։

«ԱՄՆ-ն դեռևս ունի գլոբալ պարտավորություններ՝ կապված մեր ռազմական ուժերի տեղակայման հետ, և դա մեզ անընդհատ ստիպում է նայել, թե որտեղ ենք տեղակայում մեր զորքերը: Սա պատժիչ քայլ չէ, սա պարզապես շարունակական գործընթացի մի մասն է», – ասել է Ռուբիոն։

Բացի այդ, ԱՄՆ պետքարտուղարը նշել է, որ ԱՄՆ նախագահ Դոնալդ Թրամփի «հիասթափությունը» երկրի դաշնակիցներից՝ Իրանի դեմ պատերազմում նրանց ներգրավված չլինելու պատճառով, պետք է լուծվի։

Ինչպես նշել է Ռուբիոն, հարցը կքննարկվի Անկարայում նախատեսված գագաթնաժողովում։

«Այս հարցը լուծելի է, բայց այն այսօր չի լուծվի: Սա ղեկավարության մակարդակով քննարկվող հարց է», – ասել է Ռուբիոն։