«Չեմ կարծում, որ մենք կկարողանանք համատեղ լուծել ՆԱՏՕ-ին Ուկրաինայի անդամակցության հարցը կարճաժամկետ հեռանկարում», – այս մասին ԱՄՆ-ում, Ռոնալդ Ռեյգանի ինստիտուտում հայտարարել է ՆԱՏՕ-ի գլխավոր քարտուղար Մարկ Ռյուտեն:

Նրա խոսքով՝ ինքը սպասումներ չունի, որ այս փուլում նման քաղաքական որոշման ընդունումը հնարավոր կլինի։ «Չեմ կարծում, որ մենք կկարողանանք համատեղ լուծել ՆԱՏՕ-ին Ուկրաինայի անդամակցության հարցը կարճաժամկետ հեռանկարում։ Չեմ կարծում, որ դա քաղաքականապես տեղի կունենա։ Ուստի կարծում եմ, որ սա արդարացի գնահատական է։ Ինչ վերաբերում է Ուկրաինայի կարողություններին, մենք Լեհաստանում ունենք JATEC (ՆԱՏՕ-Ուկրաինա համատեղ վերլուծության, վարժանքների և կրթության կենտրոն), որտեղ համատեղ համագործակցում ենք», – հայտարարել է Ռյուտեն:

Բացի այդ, Ռյուտեի խոսքով, ընթացող պատերազմում Ռուսաստանը հսկայական կորուստներ ունի, ինչն անպայման արդյունք կտա։ Միևնույն ժամանակ, ուկրաինացիները վճռականորեն պաշտպանում են իրենց երկիրը։

«Ռուսաստանը ամեն ամիս բազմաթիվ մարդիկ է կորցնում. ամսական 30,000-ից մինչև 35,000 մարդ զոհվում է կամ ծանր վիրավորվում։ Պատկերացնո՞ւմ եք։ Նկատի ունեմ, որ Խորհրդային Միությունը 1980-ականներին Աֆղանստանում 10 տարում 20,000-ից պակաս զինվոր կորցրեց, իսկ հիմա նույնքան կորցնում են երեք շաբաթում։ Սա մասշտաբային է, և սա ինչ-որ կերպ պետք է հասնի Մոսկվա և Սանկտ Պետերբուրգ։ Այնպես որ, սա կազդի Ռուսաստանի վրա։ Ուկրաինացիները հաստատակամորեն պաշտպանվում են և օգտագործում են նորագույն տեխնոլոգիաներ, ինչը նրանց հսկայական ուժ է տալիս», – հայտարարել է ՆԱՏՕ-ի գլխավոր քարտուղարը:

Ինչպես նշել է Ռյուտեն, Դոնալդ Թրամփի բանակցողները ակտիվորեն աշխատում են պատերազմի ավարտի ուղղությամբ։ Դաշինքի գլխավոր քարտուղարը նաև հայտարարել է, որ «տանգո պարելու համար երկու հոգի է պետք», և անհրաժեշտ է, որ պատերազմի ավարտին համաձայն լինի նաև Վլադիմիր Պուտինը։