Ուկրաինայի ՆԱՏՕ-ին անդամակցության վերաբերյալ դեռևս կոնսենսուս չկա, հայտարարել է ՆԱՏՕ-ի գլխավոր քարտուղար Մարկ Ռուտտեն Դաշինքի արտաքին գործերի նախարարների հանդիպումից առաջ տեղի ունեցած մամուլի ասուլիսում։

«Գործնական իրավիճակը, ինչպես գիտեք, այն է, որ Ուկրաինայի ՆԱՏՕ-ին անդամակցությունը պահանջում է բոլոր դաշնակիցների կոնսենսուս։ Ներկայումս, ինչպես գիտեք, Ուկրաինայի ՆԱՏՕ-ին անդամակցության վերաբերյալ կոնսենսուս չկա», – ասել է Մարկ Ռուտտեն։

Միևնույն ժամանակ, ինչպես նշել է Ռուտտեն, բոլոր դաշնակիցները գիտակցում են, որ Ուկրաինայի և Դաշինքի անվտանգությունը սերտորեն փոխկապակցված է, հետևաբար, «ՆԱՏՕ-ն փորձում է ավարտել պատերազմը Ուկրաինայում՝ երկարատև և արդար խաղաղությամբ»։

Ինչպես նշել է Դաշինքի գլխավոր քարտուղարը, ՆԱՏՕ-ն ողջունում է նախագահ Թրամփի ջանքերը այս հարցում։

ՆԱՏՕ-ի արտաքին գործերի նախարարների հանդիպումը վաղը կկայանա Բրյուսելում։ Հատկանշական է, որ ԱՄՆ պետքարտուղար Մարկո Ռուբիոն չի մասնակցի հանդիպմանը։ Ինչպես նշել է Մարկ Ռուտտեն, նախարարական հանդիպմանը կմասնակցի պետքարտուղարի տեղակալ Քրիստոֆեր Լանդաուն։