ՆԱՏՕ-ի գլխավոր քարտուղար Մարկ Ռուտտեն կոչ է արել դաշնակիցներին պատրաստ լինել Եվրոպայում ԱՄՆ ռազմական կոնտինգենտի հնարավոր կրճատմանը։

Շվեդիայում նախարարական հանդիպումից հետո Մարկ Ռուտտեն ասել է, որ ներկայումս ընթանում է ՆԱՏՕ-ի ուժերի մոդելում ԱՄՆ ներդրման վերանայումը, ուստի «դաշնակիցները պետք է պատրաստ լինեն ԱՄՆ ռազմական կոնտինգենտի հնարավոր կրճատմանը»։

Լրագրողի հարցին, թե արդյոք նա ԱՄՆ պետքարտուղար Մարկո Ռուբիոյից տեղեկատվություն է ստացել Եվրոպայում ԱՄՆ զորքերի հնարավոր կրճատման մասին, Ռուտտեն նշել է, որ հարցը գաղտնի է, բայց եվրոպացի դաշնակիցները պետք է պատրաստ լինեն նման սցենարի։

«ՆԱՏՕ-ի ուժերի մոդելում ԱՄՆ ներդրման հարցը ներկայումս քննարկվում է քաղաքական ղեկավարության մակարդակով։ Այս գործընթացը շարունակվում է, ուստի դուք պետք է պատրաստ լինեք դրան», – ասել է Ռուտտեն։

Նա ասել է, որ եվրոպացի դաշնակիցները և Կանադան ստիպված կլինեն շատ ավելի մեծ պատասխանատվություն կրել իրենց սեփական պաշտպանության համար։

«Սրանում նոր բան չկա։ Բոլորը գիտեին, որ այս գործընթացը ընթացքի մեջ է, և խոսքը միայն ԱՄՆ-ի կողմից բեռի հավասար բաշխման պահանջի մասին չէ։ Հարցն այն է, որ նրանք չեն կարող միաժամանակ ամենուր լինել», – նշեց Ռուտտեն։

Բացի այդ, Մարկ Ռուտտեն կարծում է, որ ԱՄՆ-ն դեռևս հետաքրքրված է ՆԱՏՕ-ին անդամակցությամբ, այդ թվում՝ Եվրոպայում ռազմական կարողությունների և բազաների շնորհիվ։ Նրա խոսքով՝ Իրանի դեմ վերջին ռազմական գործողությունները հստակ ցույց են տվել այդ հետաքրքրությունը։

Ռուտտեի խոսքով՝ եվրոպացի դաշնակիցները լսել են նաև ամերիկյան վարչակազմի դիտողությունները՝ Իրանի դեմ ռազմական գործողություններին աջակցության վերաբերյալ։