«Այսօրվա հանդիպման ընթացքում արդեն լսեցինք առաջին շոշափելի նախաձեռնությունը, այդ թվում՝ մասնավոր հատվածից, թե ինչպես է տեսնում մասնավոր սեկտորը սպառողական ապրանքների գների նվազեցման ուղին», – այս մասին հայտարարել է Վրաստանի էկոնոմիկայի և կայուն զարգացման նախարար Մարիամ Քվրիվիշվիլին՝ սննդամթերքի գների վերաբերյալ գործող պետական համակարգող հանձնաժողովի ձևաչափով դիստրիբյուտորական ընկերությունների ներկայացուցիչների հետ հանդիպումից հետո։

Քվրիվիշվիլիի խոսքով՝ կառավարությունը ողջունում է նման նախաձեռնությունները։

«Երկրորդ հերթական հանդիպումն էր մասնավոր հատվածի ներկայացուցիչների հետ, և այն բավականին արդյունավետ ու կառուցողական էր։ Կարող ենք վստահաբար ասել, որ բոլոր այն մոտ 8-9 գործոնները, որոնք կառավարությունը հետազոտությունների հիման վրա ճանաչել էր որպես սպառողական ապրանքների գների աճին ազդող գործոններ, այսօր հանդիպման ավարտին հաստատվեցին, և մասնավոր հատվածի ներկայացուցիչները կիսում էին նույն տեսակետները։ Հետևաբար, այս գործոնների վրա ճիշտ ու արդյունավետ արձագանքելու դեպքում մենք տեսնում ենք գների նվազեցման ռեսուրս։

Նշանակալի է, որ այսօր արդեն լսեցինք առաջին շոշափելի նախաձեռնությունը, այդ թվում՝ մասնավոր հատվածից, թե ինչպես են նրանք տեսնում գների նվազեցման ուղին։ Մենք ողջունում ենք նման նախաձեռնությունները։ Հանձնաժողովի նպատակն է նվազեցնել սպառողական ապրանքների գները։ Հետևաբար, այսօրվա առաջարկները հանձնաժողովի կողմից կքննարկվեն մանրամասնորեն՝ հասկանալու, թե արդյոք այդ առաջարկները բավարար են գների այն մակարդակով ու ծավալով նվազեցման համար, ինչը համապատասխանում է մեր երկրի յուրաքանչյուր քաղաքացու շահին», – հայտարարել է Մարիամ Քվրիվիշվիլին։