Վրաստանի էկոնոմիկայի և կայուն զարգացման նախարար Մարիամ Քվրիվիշվիլին գտնվում է Թուրքիայում, որտեղ մասնակցել է Ստամբուլի միջազգային բնական պաշարների գագաթնաժողովին (INRES):

Մարիամ Քվրիվիշվիլին ելույթ է ունեցել գագաթնաժողովի շրջանակներում անցկացված էներգետիկայի նախարարական նիստում՝ «Էներգետիկ անվտանգությունը փոփոխվող գլոբալ լանդշաֆտում. կապակցվածություն և համագործակցություն»:

Բնական պաշարների գագաթնաժողովին, որը բացել է Թուրքիայի նախագահ Ռեջեփ Թայիփ Էրդողանը, մասնակցել են տարբեր երկրների բարձրաստիճան ներկայացուցիչներ, ինչպես նաև առաջատար էներգետիկ և հանքարդյունաբերական ընկերությունների, միջազգային կազմակերպությունների և ֆինանսական հաստատությունների ներկայացուցիչներ:

Այցի շրջանակներում Մարիամ Քվրիվիշվիլին բարձր մակարդակի երկկողմ հանդիպում է ունեցել Թուրքիայի էներգետիկայի և բնական պաշարների նախարար Ալփարսլան Բայրաքթարի հետ: Բացի այդ, քառակողմ հանդիպում է տեղի ունեցել Թուրքիայի, Ադրբեջանի և Բուլղարիայի էներգետիկայի նախարարների հետ, որտեղ կողմերը քննարկել են տարածաշրջանային նշանակության նախագծեր և ապագա համագործակցության հեռանկարներ:

Նախարարի տեղակալ Թամար Իոսելիանին Մարիամ Քվրիվիշվիլիի հետ գտնվում է Թուրքիայում: