Վրաստանի և Հայաստանի միջև առևտրատնտեսական հարաբերությունների և կապերի հետագա խորացման հարցերը քննարկել են Վրաստանի էկոնոմիկայի և կայուն զարգացման նախարար Մարիամ Քվրիվիշվիլին և ՀՀ փոխվարչապետ Տիգրան Խաչատրյանը։

Վրաստանի էկոնոմիկայի նախարարության տվյալներով՝ հանդիպումը տեղի է ունեցել Մարիամ Քվրիվիշվիլիի Հայաստան այցի շրջանակներում։

Նրանց խոսքով՝ կողմերը քննարկել են երկրների միջև առևտրատնտեսական հարաբերությունների մի շարք ոլորտներ և առաջնահերթ հարցեր։

«ՀՀ փոխվարչապետ Տիգրան Խաչատրյանի հետ արդյունավետ հանդիպում է տեղի ունեցել, մենք խոսել ենք երկրների միջև հարաբերությունների և կապերի խորացման մասին։ Իհարկե, հատուկ շեշտադրում է կատարվել տնտեսական ոլորտում՝ տրանսպորտում, զբոսաշրջությունում, ինչպես նաև էներգետիկայում, սերտ համագործակցության հարցերին։ Բացի այդ, մեզ համար առաջնահերթություն է առավելագույնս օգտագործել Հայաստանի հետ առկա հարաբերությունները՝ վրացական արտադրանքի արտահանումը Հայաստան խթանելու համար, ինչը, անշուշտ, կամրապնդի վրաց ձեռնարկատերերին», – ասել է Մարիամ Քվրիվիշվիլին։

Ըստ էկոնոմիկայի նախարարի, ՀՀ փոխվարչապետի հետ հանդիպման ժամանակ ընդգծվել է Վրաստանի դերը և ներդրումը տարածաշրջանում խաղաղության ապահովման գործում, «հատկապես այն ժեստի վերաբերյալ, որը Վրաստանի կառավարությունը ցուցաբերեց՝ Ադրբեջանից Հայաստան նավթամթերքների տեղափոխման համար խորհրդանշական սակագին սահմանելով»։

Ըստ էկոնոմիկայի նախարարության, ինչպես նշվել է, Վրաստանի կառավարության այս որոշումը մեծ նշանակություն ուներ երկու երկրների համար։

Հանդիպման ժամանակ անդրադարձ է եղել նաև էներգետիկ ոլորտում համագործակցության խորացմանը՝ ներմուծման, արտահանման, ինչպես նաև տարանցման ոլորտներում։

Ինչպես նշել է էկոնոմիկայի և կայուն զարգացման նախարարը, Վրաստանը շարունակում է մնալ շատ հուսալի գործընկեր, հատկապես որպես կապող, տարանցիկ երկիր ՀՀ-ի և Եվրամիության երկրների միջև։

«Մենք ունենք բազմաթիվ ընդհանուր ծրագրեր այս ուղղությամբ, այդ թվում՝ ենթակառուցվածքների զարգացումը, որը կապահովի էներգետիկ ոլորտի ամրապնդումն ընդհանուր առմամբ՝ մի կողմից՝ էլեկտրաէներգիայի, մյուս կողմից՝ գազամատակարարման առումով», – ասել է Մարիամ Քվրիվիշվիլին։

ՀՀ փոխվարչապետի հետ հանդիպմանը մասնակցել են էկոնոմիկայի փոխնախարարներ Գենադի Արվելաձեն և Թամար Իոսելիանին, ինչպես նաև ՀՀ-ում Վրաստանի դեսպան Գիորգի Շարվաշիձեն։